బంగారు జింకలు రామాయణంలో విన్నాం.. ఇప్పుడు తెల్ల జింకలు దేశంలో కనిపిస్తున్నాయి. జింక అనగానే ముదురు గోధుమ వర్ణం రంగులో.. తెల్ల మచ్చలతో ఉంటాయి.. ఈ జింక మాత్రం పాల తెలుపులో ఉంది.. చెవులు కూడా తెల్లగా నిగనిగలాడుతున్నాయి.. ఈ అరుదైన తెల్ల జింక ఫోటోలను ఫారెస్ట్ శాఖ అధికారి అకాష్ ట్విట్టర్ ద్వారా వెలుగులోకి తెచ్చారు.
ఉత్తర ప్రదేశ్ రాష్ట్రం కతర్నియా ఘాట్ వన్య ప్రాణుల అభయారణ్యంలో తెల్ల జింకలు ఉన్నాయని.. ఓ పెద్ద ఆడ జింక వెంట ఈ చిన్న తెల్ల జింక వెళుతూ కనిపించిందంటూ ట్విట్ చేశారు ఫారెస్ట్ ఆఫీసర్. ఇలాంటివి చాలా అరుదుగా ఉంటాయని.. జన్యుపరమైన సమస్యలు ఉంటేనే.. ఈ రంగులో ఉంటాయని వెల్లడించారు. ఇది చాలా ప్రమాదకరం అన్నారు. అడవిలో ఫలానా జంతువులు.. ఫలానా రంగుంలో ఉంటాయని అందరికీ స్పష్టంగా తెలియటంతోపాటు.. మిగతా జంతువులకు ఓ అవగాహన ఉంటుందన్నారు. జింక తెల్ల రంగులో ఉండటం వల్ల దానికి మిగతా జంతువులు, మనుషుల నుంచి ముప్పు వాటిల్లే ప్రమాదం ఉంటుందని ఆందోళన వ్యక్తం చేశారాయన. తెల్ల జింకకు భద్రతాపరమైన ఇబ్బందులు వస్తాయంటున్నారు.
ఆయా జంతువులు తమ సహజమైన రంగులో కాకుండా ఇతర రంగుల్లో పుట్టినట్లయితే.. వాటికి అనారోగ్య సమస్యలు కూడా వస్తాయని.. కళ్లు కనిపించకపోవటం వంటి అనారోగ్య సమస్యలు వచ్చే ప్రమాదం ఉందన్నారు. ఈ తెల్ల జింక మాత్రం నెటిజన్లను విపరీతంగా ఆకర్షిస్తుంది. అప్పట్లో బంగారు జింకలు ఉన్నాయని మాత్రమే విన్నాం.. ఇప్పుడు తెల్ల జింక సూపర్ గా ఉందంటున్నారు.. ఇలాంటి అరుదైన జింకలను కాపాడుకోవాలని.. ప్రత్యేకమైన జింకగా పరిగణించి.. ఇలాంటి వాటి సంఖ్యను పెంచాలని కోరుతున్నారు. అరుదైన జింకగా గుర్తించి.. సంరక్షణ చర్యలు తీసుకోవాల్సిన అవసరం ఉందని సూచిస్తనునారు నెటిజన్లు. అయితే 15 ఏళ్ల క్రితం ఒడిశాలో కూడా ఇలాంటి తెల్ల జింక ఒకటి కనిపించినట్లు సుశాంత్ నందా అనే ఫారెస్ట్ అధికారి చెబుతున్నారు. ఆ తర్వాత మళ్లీ ఇప్పుడే చూడటం జరిగిందంటున్నారు. ఎవరి వెర్షన్స్ ఎలా ఉన్నా.. తెల్ల జింక మాత్రం ముచ్చటగా.. భలే ఉంద కదా..
