వాషింగ్టన్: అమెరికా అధ్యక్షుడు ట్రంప్ విధించిన టారిఫ్‌‌‌‌ల కారణంగా బట్టలు, బ్యాగుల ధరలు భారీగా పెరిగాయని ఆ దేశానికి చెందిన ఇన్స్టాగ్రామ్ యూజర్ మెర్సిడెస్ చాండ్లర్ విమర్శించింది. టారిఫ్ విధించకముందు వాల్మార్ట్లో బట్టల రేటు ఎంత ఉంది..? టారిఫ్ తర్వాత ఎంతకు పెరిగిందన్న దానిపై షేర్ చేసిన వీడియో సోషల్ మీడియాలో వైరల్ అవుతున్నది. కొన్ని గంటల్లోనే 30 లక్షల మందికిపైగా ఈ వీడియోను చూశారు. వాల్మార్ట్ స్టోర్కు వెళ్లిన చాండ్లర్.. పెద్దల షర్టులు, పిల్లలు వేసుకునే బట్టలు, బ్యాగులను పరిశీలించారు. వాల్మార్ట్ సిబ్బంది పాత ట్యాగ్లను కవర్ చేస్తూ కొత్త స్టిక్కర్లు వేశారు.
కొన్నింటిపై పాత ట్యాగ్లు కనిపిస్తున్నాయి. టారిఫ్ విధించకముందు షర్ట్ ధర రూ.960 ఉంటే.. అది రూ.1,050కు పెరిగింది. చిన్న పిల్లల షర్ట్ ఏకంగా రూ.611 నుంచి రూ.960కు పెరిగింది. ట్రావెల్ బ్యాగ్ ధర రూ.1,748 నుంచి ఏకంగా రూ.2,186కు హైక్ అయింది. ఈ వీడియోకు ‘‘డొనాల్డ్ ట్రంప్ టారిఫ్‌‌‌‌లు జోరుగా సాగుతున్నాయి’’అని క్యాప్షన్ ఇచ్చారు. ఈ వీడియోపై పలువురు నెటిజన్లు భిన్నంగా స్పందించారు. “ఇది విలువైనదేనా? మనం ఇప్పటికీ గొప్పగా ఉన్నామా?” అని ఓ యూజర్ అంటే.. మరో యూజర్, ‘మేక్ అమెరికా గ్రేట్ అగైన్’ నినాదంపై ఎద్దేవా చేశారు. “టారిఫ్‌‌‌‌ల ద్వారా అమెరికాకు బిలియన్ల డాలర్లు వస్తున్నాయి, దానికి బదులుగా షర్ట్‌‌‌‌కు ఒక డాలర్ ఎక్కువ చెల్లించాలి” అని మరో యూజర్ అన్నాడు.
