- 300 బిలియన్ డాలర్ల అతిపెద్ద ఆయిల్ రిఫైనరీ ఏర్పాటులో భాగస్వామ్యం
- ప్రకటించిన అమెరికా అధ్యక్షుడు డొనాల్డ్ ట్రంప్
వాషింగ్టన్/న్యూఢిల్లీ : రిలయన్స్ ఇండస్ట్రీస్ అమెరికాలో భారీ పెట్టుబడి పెట్టేందుకు రెడీ అయింది. టెక్సాస్ రాష్ట్రంలోని బ్రౌన్స్విల్లే వద్ద ‘అమెరికా ఫస్ట్ రిఫైనరింగ్ సంస్థ’ ఏర్పాటు చేయబోతున్న భారీ రిఫైనరీ ప్రాజెక్టులో భాగస్వామ్యం కాబోతున్నది. ఈ విషయమై అమెరికా అధ్యక్షుడు డొనాల్డ్ ట్రంప్ బుధవారం ప్రకటన చేశారు. ఈ ప్రాజెక్టు విలువ సుమారు 300 బిలియన్ డాలర్లు అని వెల్లడించారు.
ఇది చరిత్రాత్మకమైన నిర్ణయమని, దాదాపు 50 ఏండ్ల తర్వాత అమెరికాలో కొత్త ఆయిల్ రిఫైనరీని ఏర్పాటు కానుందని చెప్పారు. ఇందులో భాగస్వామ్యం కాబోతున్న రిలయన్స్కు అభినందనలు తెలిపారు. అమెరికా చరిత్రలోనే ఇది అతిపెద్ద పెట్టుబడి అని ట్రంప్పేర్కొన్నారు. ఈ రిఫైనరీ ఏర్పాటుతో వేలాది మందికి ఉపాధి దొరకడంతోపాటు టెక్సాస్ ఆర్థికంగా అభివృద్ధి చెందుతుందన్నారు.
ఈ ప్రాజెక్టుతో అమెరికా ఇంధన సామర్థ్యం పెరుగుతుందన్నారు. ఈ రిఫైనరీ పూర్తిగా అమెరికాలో ఉత్పత్తి అయ్యే షేల్ ఆయిల్తోనే పనిచేసేలా రూపకల్పన చేయనున్నట్లు అమెరికా ఫస్ట్ రిఫైనరింగ్ సంస్థ తెలిపింది. రిలయన్స్ సంస్థ ఈ రిఫైనరీలో తయారయ్యే ఇంధనాన్ని 20 ఏండ్ల పాటు కొనుగోలు చేయడానికి ఒప్పందం చేసుకుంది. ఈ ప్రాజెక్టు నిర్మాణ పనులు 2026 రెండో త్రైమాసికంలో ప్రారంభం కానున్నట్టు సమాచారం.
