ఓమిక్రాన్ నేపథ్యంలో తాత్కాలిక ఆంక్షలు విధించింది తెలంగాణ ప్రభుత్వం. హైకోర్టు ఉత్తర్వుల ఆదేశాలతోనే ఆంక్షలు విధించిన సర్కార్.. జనాలు ఎక్కువ ఉన్నచోట్ల థర్మల్ స్కానింగ్, మాస్క్ తప్పనిసరి చేసింది. భౌతికదూరం కూడా తప్పనిసరిగా పాటించాలన్న ప్రభుత్వం .. ఈ క్రమంలోనే జనవరి 2వ తేదీ, 2022 వరకు రూల్స్ వర్తించనున్నట్లు తెలిపింది. అన్ని జిల్లాల కలెక్టర్లకు ఆదేశాలు జారీ చేసిన ప్రభుత్వం..డిసెంబర్ 31 నుండి జనవరి 2 వరకు ర్యాలీలు, బహిరంగ సభలు నిషేధమని చెప్పింది. ఓమిక్రాన్ పెరుగుతున్న క్రమంలో ప్రజలు అప్రమత్తంగా ఉండాలని తెలిపింది. పబ్లిక్ ఈవెంట్స్ లో భౌతిక దూరం తప్పనిసరి చేస్తూ నిర్ణయం తీసుకోగా..మాస్క్ పెట్టుకోకపోతే కఠిన చర్యలు తప్పవని తెలిపింది తెలంగాణ రాష్ట్ర ప్రభుత్వం.
