హైదరాబాద్, వెలుగు: ఇరిగేషన్ డిపార్ట్మెంట్లో వచ్చే ఏడాది భారీ సంఖ్యలో అధికారులు రిటైర్ కాబోతున్నారు. ఈఎన్సీ జనరల్ అనిల్ కుమార్, మరో ఈఎన్సీ శంకర్ సహా 68 మంది అధికారులు రిటైర్మెంట్ లిస్టులో ఉన్నారు. రిటైర్ అవుతున్న అధికారుల జాబితాతో శుక్రవారం ఇరిగేషన్ శాఖ సెక్రటరీ రాహుల్ బొజ్జా జీవో జారీ చేశారు. 61 ఏండ్లు నిండిన అధికారులు లిస్టులో పేర్కొన్న ప్రకారం రిటైర్ అయిపోవాలని స్పష్టం చేశారు.
రిటైర్ కాబోతున్న అధికారుల జాబితాలో ఏడుగురు సీఈలు, 15 మంది ఎస్ఈలు, 27 మంది ఈఈలు, 17 మంది డీఈఈలు ఉన్నారు. అయితే, ఇప్పటికే అధికారుల కొరతతో పనిభారంతో సతమతమవుతున్న డిపార్ట్మెంట్కు వచ్చే ఏడాది ఇంత మంది ఉన్నతాధికారులు రిటైర్ అయితే మరింత భారం పెరుగుతుందన్న అభిప్రాయాలు వ్యక్తమవుతున్నాయి. ప్రమోషన్లకు సంబంధించి ఇప్పటికే చాలా మంది అధికారులు ఉన్నతాధికారులకు వినతిపత్రం అందజేశారు. జోన్ 6 ప్రమోషన్లకు సంబంధించి సుప్రీంకోర్టులో ఉన్న కేసు కూడా అడ్డంకిగా మారింది.
