హైదరాబాద్ రేషన్ షాపుల్లో కాటన్ సంచుల్లో సన్న బియ్యం

• ప్లాస్టిక్ బ్యాగుల వినియోగం తగ్గించేందుకే.. ఇతర అవసరాలకూ వాడుకోవచ్చు

హైదరాబాద్ ​సిటీ, వెలుగు: గ్రేటర్ ​హైదరాబాద్ పరిధిలో వచ్చే నెల నుంచి రేషన్​ షాపుల్లో మల్టీపర్పస్​బ్యాగుల ద్వారా సన్నబియ్యం పంపిణీ చేయనున్నారు. కాంగ్రెస్​ ప్రభుత్వం ఏర్పడిన తర్వాత చేపట్టిన అభివృద్ధి పనులను తెలియజేసే ఆరు గ్యారంటీల లోగో ముద్రించిన సంచుల్లో బియ్యం పంపిణీ చేయనున్నట్టు పౌర సరఫరాల శాఖ అధికారులు తెలిపారు. గత నెలలోనే ఈ విధానాన్ని ప్రవేశపెట్టాలని భావించినా.. జూబ్లీహిల్స్​ఉప ఎన్నిక కారణంగా కోడ్​అమలులో ఉండడంతో కుదరలేదు. ప్రస్తుతం కోడ్​ఎత్తివేసిన నేపథ్యంలో వచ్చే నెల నుంచి రేషన్​షాపుల్లో సన్నబియ్యం పొందే లబ్ధిదారులకు నాణ్యమైన, మందమైన బట్టతో ఉండే సంచుల్లో బియ్యం ఇవ్వనున్నారు. 

ఇంతకు ముందు అమ్మ హస్తం పేరుతో..
గతంలోనూ తెలంగాణ ఏర్పడక ముందు కాంగ్రెస్​ప్రభుత్వ హయాంలో అమ్మహస్తం పేరుతో రేషన్​షాపుల్లో బియ్యం, ఇతర కిరాణా వస్తువులు పంపిణీ చేసేవారు. దీనికి అప్పట్లో మంచి స్పందన వచ్చింది. ప్రస్తుతం కాంగ్రెస్​ప్రభుత్వం కొనసాగుతున్న నేపథ్యంలో ముఖ్యమంత్రి రేవంత్​రెడ్డి సైతం సన్నబియ్యం పంపిణీకి మల్టీపర్పస్​ బ్యాగులను వినియోగించాలని నిర్ణయించారు. ఈ సంచులపై సీఎం రేవంత్​రెడ్డి, పౌరసరఫరాల శాఖ మంత్రి ఉత్తమ్​కుమార్​రెడ్డి ఫొటోతో పాటు ప్రభుత్వం అమలు చేస్తున్న ఆరు గ్యారంటీల లోగోను స్పష్టంగా కనిపించేలా ముద్రించారు. 

కాటన్ ​వినియోగాన్ని ప్రోత్సహించేందుకే..
ప్రస్తుతం రోజువారీగా ప్లాస్టిక్ ​వాడకం భారీగా పెరిగిపోయింది. షాప్​కు, మార్కెట్​కు , మాల్స్​కు వెళ్లినప్పుడు ప్లాస్టిక్​కవర్లలోనే సామాన్లు తెచ్చుకుంటున్నారు. ఈ రకంగా ఒక్కో వ్యక్తి తన ఇంటికి రోజూ పది నుంచి 12 ప్లాస్టిక్​ కవర్లను తీసుకువెళ్తున్నట్టు ఒక సర్వే రిపోర్ట్​ ఉంది. యూజ్ ​చేశాక తిరిగి చెత్తకుప్పల్లో పడేస్తుండడంతో పర్యావరణానికి ముప్పుగా పరిణమించింది. ఈ విషయాన్ని కూడా దృష్టిలో పెట్టుకుని కాటన్ ​వినియోగాన్ని ప్రోత్సహించేందుకు కూడా ప్రభుత్వం రేషన్ ​షాపుల్లో క్లాత్​బ్యాగ్​లలో బియ్యం పంపిణీ చేయాలని నిర్ణయించింది. వీటిని కూరగాయలు, ఇతర సామగ్రి తెచ్చుకునేందుకు కూడా ఉపయోగించవచ్చంటున్నారు. 

8.28 లక్షలకు చేరిన రేషన్​ కార్డులు 
నగరంలో రేషన్​కార్డుల సంఖ్య గణనీయంగా పెరిగింది. గత ఫిబ్రవరి నాటికి సిటీలోని తొమ్మది సర్కిళ్ల పరిధిలో 6,39,451 కార్డులున్నట్టు రికార్డులు చెబుతున్నాయి. కానీ, ప్రభుత్వం కొత్త రేషన్​కార్డులను ఇవ్వడం మొదలుపెట్టిన తర్వాత ఇప్పటి వరకూ సిటీలో కొత్త 1,88,699 కార్డులను అందజేసింది. దీంతో ఇప్పుడు మొత్తం కార్డుల సంఖ్య 8,28,150 కు చేరింది. కొత్త రేషన్​కార్డుల పంపిణీ నిరంతర ప్రక్రియగా చెప్తుండడంతో ఇవి ఇంకా పెరిగే అవకాశం ఉంది.