న్యూయార్క్: ఇండియాపై అమెరికా భారీగా టారిఫ్లు వేయడం అనేది ఏనుగును ఎలుక పిడిగుద్దు గుద్దినట్టుగా ఉందని అమెరికన్ ఎకనమిస్ట్ రిచర్డ్ వాల్ఫ్ అన్నారు. తన కాలికి తానే గన్తో షూట్ చేసుకున్న వ్యక్తి ప్రపంచంలో అందరికంటే తానే చాలా దృఢంగా ఉన్నానని యాక్టింగ్ చేసినట్లుగా ట్రంప్ తీరుందని విమర్శించారు. ‘రష్యా టుడే’ మీడియా సంస్థకు ఇచ్చిన తాజా ఇంటర్వ్యూలో ఆయన ఈ మేరకు తన అభిప్రాయాలను పంచుకున్నారు.
‘‘ప్రపంచంలోనే అత్యధిక జనాభా కలిగిన దేశం ఇండియా.. అలాంటి దేశానికి ఏం చేయాలో చెప్పాలని ఆదేశించడం అంటే ఏనుగును ఎలుక గుద్దినట్టే అవుతుంది. అంతేకాదు.. ట్రంప్ తీరుతో వెస్ట్రన్ కంట్రీస్కు ప్రత్యామ్నాయంగా బ్రిక్స్ (బ్రెజిల్, రష్యా, ఇండియా, చైనా, సౌతాఫ్రికా, ఇతర దేశాల కూటమి) మరింత బలోపేతం అవుతుంది” అని వాల్ఫ్ చెప్పారు. రష్యా నుంచి చమురు కొంటున్నదుకు ఇండియాకు పనిష్మెంట్గా 50% టారిఫ్లు విధించారు.
అయితే, అమెరికా ఆంక్షలు విధించినా.. రష్యా తన చమురుకు కొత్త మార్కెట్ను క్రియేట్ చేసుకుంది. అలాగే ఇండియా కూడా అమెరికా మార్కెట్ను వదులుకుని బ్రిక్స్ దేశాలతోపాటు ఇతర దేశాలకు తన వస్తువులు అమ్ముతుంది” అని ఆయన తెలిపారు. ‘‘ప్రస్తుతం బ్రిక్స్ కూటమిలోని దేశాలన్నీ కలిపి ప్రపంచ ఉత్పత్తిలో 35% వాటా కలిగి ఉన్నాయి. మరోవైపు అమెరికా, ఈయూ, తదితర దేశాలతోకూడిన జీ7 కూటమి వాటా 28 శాతమే. ప్రస్తుతం బ్రిక్స్ కూటమి రోజురోజుకూ బలపడుతున్నది. మనం చరిత్రలో కీలక మలుపును చూస్తున్నాం” అని వాల్ఫ్ అభిప్రాయపడ్డారు.
