జగిత్యాల జిల్లాలో ఘోర రోడ్డు ప్రమాదం జరిగింది. రెండు కార్లు బైక్ ఢీకొనడంతో ఇద్దరు మృతి చెందగా ముగ్గురికి తీవ్ర గాయాలయ్యాయి. శుక్రవారం ( అక్టోబర్ 16 ) జరిగిన ఈ ఘటనకు సంబంధించి వివరాలిలా ఉన్నాయి.. జిల్లాలోని వెల్గటూరు మండలం కప్పరావుపేట గ్రామం దగ్గర జరిగింది ఈ ప్రమాదం.రెండు కార్లు, ఒక బైక్ ఢీకొన్న ఘటనలో కారు నుజ్జునుజ్జయింది.
ఈ ప్రమాదంలో ముగ్గురికి తీవ్ర గాయాలవ్వగా.. బైక్ పై ప్రయాణిస్తున్న ఇద్దరు మృతి చెందారు. మృతుల్లో ఒకరు ఛాత రాజుల కొమురయ్య, మరొకరు ముల్కల శ్రీనుగా గుర్తించారు. మృతులు కిషన్ రావు పేట గ్రామానికి చెందినవారని తెలుస్తోంది.
ఈ ఘటనలో గాయపడ్డ క్షతగాత్రులను చికిత్స నిమిత్తం అంబులెన్స్ లో ఆసుపత్రికి తరలించారు. కారు డ్రైవర్ నిర్లక్ష్యమే ప్రమాదానికి కారణమని తెలుస్తోంది.
ఈ ఘటనపై సమాచారం అందుకున్న పోలీసులు ఘటనాస్థలానికి చేరుకొని పరిస్థితిని పరిశీలించారు. మృతదేహాలను పోస్టుమార్టం నిమిత్తం ప్రభుత్వాసుపత్రికి తరలించారు. ఈ ఘటనపై కేసు నమోదు చేసి దర్యాప్తు చేస్తున్నారు పోలీసులు.
