అంబర్పేట్, వెలుగు: పేదలకు మెరుగైన వైద్యం అందించడమే కేంద్ర ప్రభుత్వ లక్ష్యమని కేంద్ర మంత్రి కిషన్ రెడ్డి అన్నారు. అంబర్పేట్ నియోజకవర్గంలోని కాచిగూడ, బాగ్ అంబర్పేట్ డివిజన్లలో ఉన్న యూపీహెచ్సీ సెంటర్లకు 13 రకాల వైద్య పరికరాలను శుక్రవారం ఆయన అందజేశారు.
ప్రభుత్వ ఆసుపత్రుల్లో మౌలిక వసతుల కల్పనకు ప్రాధాన్యత ఇస్తున్నట్లు తెలిపారు. కార్పొరేట్ వైద్యం భరించలేని పేదల కోసం సనత్నగర్లోని ఈఎస్ఐ ఆసుపత్రిని బలోపేతం చేశామని, ప్రస్తుతం ఇక్కడ గాంధీ, ఉస్మానియా కంటే ఎక్కువ ఓపీ నమోదవుతోందని చెప్పారు.
బీబీనగర్లో రూ. 1300 కోట్లతో నిర్మిస్తున్న ఎయిమ్స్ను వచ్చే ఏడాది ప్రధాని మోదీ ప్రారంభిస్తారని, అక్కడ కేవలం రూ. 10కే నాణ్యమైన వైద్యం అందుతుందని వెల్లడించారు. కార్యక్రమంలో బీజేపీ నాయకులు, వైద్య సిబ్బంది పాల్గొన్నారు.
