జీడిమెట్ల, వెలుగు: బీజేపీకి ఓటు వేస్తే ధర్మానికి వేసి గెలిపించినట్లేనని తమిళనాడు బీజేపీ అధ్యక్షుడు అన్నామలై పేర్కొన్నారు. కుత్బుల్లాపూర్ బీజేపీ అభ్యర్థి కూన శ్రీశైలంగౌడ్కు మద్దతుగా ఆయన బుధవారం ప్రచారం చేశారు. ఈ సందర్భంగా అన్నామలై మాట్లాడుతూ.. దేశాన్ని రక్షించాలన్నా, సనాతన హిందు ధర్మాన్ని కాపాడాలన్నా బీజేపీతోనే సాధ్యమన్నారు. కూన శ్రీశైలంగౌడ్ నిరంతరం ప్రజా సమస్యల పరిష్కారానికి తపించే వ్యక్తి అని, ఆయనకు మద్దతుగా ప్రచారానికి వచ్చానని తెలిపారు.
బీఆర్ఎస్, కాంగ్రెస్ కుటుంబ పార్టీలని, బీజేపీ మాత్రమే ప్రజల పార్టీ అని ఆయన పేర్కొన్నారు. కుత్బుల్లాపూర్ 131 డివిజన్లో, దుండిగల్ మున్సిపాలిటీలో చేపట్టిన ప్రచారానికి భారీగా ప్రజలు తరలివచ్చి శ్రీశైలంగౌడ్కి మద్దతు తెలిపారు. కూన శ్రీశైలంగౌడ్ మాట్లాడుతూ.. కాంగ్రెస్ని ప్రజలు నమ్మే పరిస్థితుల్లో లేరని, ఆ పార్టీకి ఓట్లేస్తే.. ఎన్నికలయ్యాక బీఆర్ఎస్ లో చేరతారన్నారు. తనని గెలిపిస్తే కుత్బుల్లాపూర్ అభివృద్ధికి కృషి చేస్తానని, జీడిమెట్ల ఈఎస్ఐ ఆస్పత్రిని ఆధునీకరిస్తానని హామీ ఇచ్చారు. ఐడీపీఎస్ చౌరస్తా నుంచి గండి మైసమ్మ వరకు ఫ్లై ఓవర్ నిర్మిస్తామని చెప్పారు. కార్యక్రమంలో బీజేపీ సీనియర్ నేతలు, జనసేన నాయకులు పాల్గొన్నారు.
