మహానటి సావిత్రి గారి 90వ జయంతి వేడుకలను హైదరాబాద్‌‌‌‌లోని రవీంద్రభారతిలో డిసెంబర్ 1 నుంచి 6 వరకు ‘సావిత్రి మహోత్సవ్' పేరిట నిర్వహిస్తున్నట్టు కుటుంబ సభ్యులు తెలియజేశారు. సంగమం ఫౌండేషన్‌‌‌‌తో కలిసి నిర్వహిస్తున్న ఈ ఉత్సవాల్లో డిసెంబర్ 1 నుంచి 5 వరకు సావిత్రి గారి సినిమాల ప్రదర్శన, పాటల పోటీలు ఉంటాయి.
డిసెంబర్ 6న ‘మహానటి’ చిత్ర దర్శక నిర్మాతలైన నాగ్ అశ్విన్, ప్రియాంకాదత్, స్వప్నాదత్ లనూ, ‘సావిత్రి క్లాసిక్స్’ పుస్తక రచయిత సంజయ్ కిషోర్, ప్రచురణకర్త బొల్లినేని కృష్ణయ్యలనూ ప్రత్యేకంగా సత్కరించనున్నట్టు సావిత్రి కుమార్తె విజయచాముండేశ్వరి చెప్పారు. మండలి బుద్ధప్రసాద్ అధ్యక్షతన జరిగే ఈ సభకు మాజీ ఉపరాష్ట్రపతి వెంకయ్య నాయుడు ముఖ్య అతిథిగా పాల్గొనబోతున్నారు. అలాగే చిత్రపరిశ్రమ నుంచి పలువురు ప్రముఖులు హాజరు కానున్నారు.
