బెంగాల్‎లో మరో షాకింగ్ ఘటన.. సెలైన్ ఎక్కిస్తుండగా నర్సుపై లైంగిక వేధింపులు

బెంగాల్‎లో మరో షాకింగ్ ఘటన.. సెలైన్ ఎక్కిస్తుండగా నర్సుపై లైంగిక వేధింపులు

కోల్​కతా: నైట్ డ్యూటీలో ఉన్న ఓ నర్సుతో పేషెంట్ అసభ్యకరంగా ప్రవర్తించాడు. సెలైన్ ఎక్కిస్తుండగా ఆమె ప్రైవేట్ పార్ట్స్‎ను తాకుతూ లైంగిక వేధింపులకు పాల్పడ్డాడు. ఈ ఘటన శనివారం రాత్రి వెస్ట్ బెంగాల్ బీర్భూమ్ జిల్లాలోని ఇల్లంబజార్ హెల్త్ సెంటర్‎లో చోటు చేసుకున్నది. నర్సుతో అసభ్యకరంగా ప్రవర్తిస్తున్న టైమ్‎లో పేషెంట్ కుటుంబ సభ్యులు అక్కడే ఉన్నారు. బాధితురాలు ఈ విషయాన్ని ఉన్నతాధికారుల దృష్టికి తీసుకెళ్లింది. దీంతో వారు పోలీసులకు ఫిర్యాదు చేయడంతో సదరు పేషెంట్‎ను అరెస్ట్ చేశారు. ఇప్పటికే కోల్​కతాలోని ఆర్జీ కర్ మెడికల్ కాలేజ్, హాస్పిటల్ ఘటనతో రాష్ట్ర వ్యాప్తంగా డాక్టర్లు నిరసన తెలియజేస్తున్నారు. 

బీర్భూమ్ జిల్లా ఇన్సిడెంట్‎తో ఇల్లంబజార్ హెల్త్ సెంటర్ వద్ద శనివారం అర్ధరాత్రి టెన్షన్ వాతావరణం ఏర్పడింది. కాగా, బాధిత నర్సు మాట్లాడుతూ.. ‘‘​ఆరోగ్యం బాగా లేకపోవడంతో ఒకతను హెల్త్ సెంటర్‎కు వచ్చాడు. పరీక్షించాక అతన్ని ఎమర్జెన్సీ డిపార్ట్​మెంట్‎కు తీసుకెళ్లాను. డ్యూటీ డాక్టర్ సూచన మేరకు సెలైన్ ఎక్కిస్తుండగా.. అతను నాతో అసభ్యకరంగా ప్రవర్తించాడు. నా ప్రైవేట్ పార్ట్స్‎ను తాకుతూ బూతులు మాట్లాడాడు. ఈ ఘటన జరుగుతున్నప్పుడు పేషెంట్ ఫ్యామిలీ మెంబర్స్ అక్కడే ఉన్నారు. ఎంత ధైర్యం ఉంటే.. ఫ్యామిలీ మెంబర్స్ ముందే అతను నన్ను లైంగికంగా వేధిస్తాడు?’’ అని బాధిత నర్సు చెప్పింది.