హీరో సిద్ధు జొన్నలగడ్డ మరో సరికొత్త ప్రేమకథా చిత్రంతో అలరించేందుకు సిద్ధమవుతున్నాడు. తన కెరీర్‌‌‌‌‌‌‌‌లో ఇది పదో చిత్రం. నయన్ సారిక హీరోయిన్‌. దర్శకుడు సుకుమార్ టీమ్‌‌‌‌లో ఒకరైన మోహన్ బి ఈ చిత్రంతో దర్శకుడిగా పరిచయం అవుతున్నాడు. తబిత సుకుమార్ సమర్పణలో సుకుమార్ రైటింగ్స్, బన్నీ వాస్ వర్క్స్ కలిసి నిర్మిస్తున్నాయి. అన్మోల్ శర్మ, బన్నీ వాస్, అశోక్ బండ్రెడ్డి నిర్మాతలు.
జీవీ ప్రకాష్ కుమార్ సంగీతం అందిస్తున్నాడు. బుధవారం పూజా కార్యక్రమాలతో ఈ చిత్రాన్ని ప్రారంభించారు. సుకుమార్ కెమెరా స్విచ్ ఆన్ చేయగా, అల్లు అరవింద్ క్లాప్ కొట్టారు. దర్శకులు హరీశ్ శంకర్, నందినీ రెడ్డి గౌరవ దర్శకత్వం వహించారు.
నిర్మాతలు విశ్వప్రసాద్, బాపినీడు, దర్శకులు బుచ్చిబాబు, చందూ మొండేటి చిత్ర బృందానికి స్క్రిప్ట్‌‌‌‌ను అందజేశారు. ఈ కొత్త తరహా ప్రేమకథా చిత్రంలో సిద్ధు చాలా కొత్తగా కనిపిస్తాడని మేకర్స్‌ తెలియజేశారు. త్వరలో రెగ్యులర్ షూటింగ్ ప్రారంభం కానుంది.
