భద్రాచలం, వెలుగు : సీతమ్మసాగర్ బ్యారేజీ నిర్మాణంలో కదలిక వచ్చింది. పనులను రాష్ట్ర ప్రభుత్వం సర్కార్ స్పీడప్ చేస్తోంది. ఆగిన భూసేకరణ పనులను తిరిగి షురూ చేసింది. చర్ల మండలం దండుపేట(జెడ్) గ్రామంలో 34.25 ఎకరాల భూమిని సేకరించేందుకు ఇటీవల నోటిఫికేషన్ను జారీ చేసింది. చెన్నై ఎన్జీటీ బెంచ్ ఆదేశాలతో ఆగిన సీతమ్మసాగర్ బ్యారేజీ పనులను తిరిగి ప్రారంభం కానున్నాయి. గతంలో ఎన్జీటీ పనులు ఆపాలని ఆదేశిస్తూ, ప్రభుత్వానికి 53.41కోట్ల జరిమానాను కూడా విధించింది. అయితే ముందుగా దీనిపై అప్పీలు చేసేందుకు సర్కార్ సమాలోచనలు చేసినా తర్వాత సమయం వృథా చేయకుండా అనుమతులు తీసుకొచ్చి బ్యారేజీ నిర్మాణం కోసం ఆటంకాలు తొలగించుకోవాలని నిర్ణయించింది.
ఈ నేపథ్యంలోనే ఇటీవల బ్యారేజీ డీపీఆర్కు ఎకనమిక్ ఫీజబులిటీ, టెక్నికల్ అడ్వయిజరీ కమిటీల అనుమతి పొందింది. ఇక పర్యావరణ, అటవీశాఖ అనుమతులు తెచ్చుకోవడంపైనే దృష్టిసారించింది. ఈ లోగా భూసేకరణ తంతును ముగించాలని భావించి తాజాగా నోటిఫికేషన్ ఇచ్చింది. రూ.3,426కోట్లతో సీతమ్మసాగర్ బ్యారేజీని దుమ్ముగూడెం-అశ్వాపురం మండలాల మధ్య కాటన్ ఆనకట్టకు దిగువన 37 టీఎంసీల సామర్థ్యం గల బ్యారేజీని, 320 మెగావాట్ల జలవిద్యుత్ కేంద్రంను నిర్మిస్తోంది.
నాటి సర్కార్ నిర్వాకంతోనే...
గత ప్రభుత్వం రూ.13,500కోట్లతో సీతారామప్రాజెక్టు ఎత్తిపోతల పథకాన్ని ప్రారంభించింది. నిధుల విడుదలలో జాప్యం, పనుల ఆలస్యం కారణంగా అనేక ఆటంకాలు ఏర్పడ్డాయి. ఈలోగా సీతారామా ప్రాజెక్టుకు అవసరమైన నీటి లభ్యత కోసం సీతమ్మసాగర్ బ్యారేజీని నిర్మాణం కోసం ఎలాంటి అనుమతులు తీసుకోలేదు. దీనితో ఇబ్బందులు ఏర్పడ్డాయి. ఫలితంగా నేషనల్ గ్రీన్ ట్రిబ్యునల్ చెన్నై బెంచ్ బ్యారేజీ నిర్మాణం ఆపాలని ఆదేశాలు జారీ చేసింది. దీనితో సీతారామ ప్రాజెక్టు మూడు పంప్ హౌస్లు మూలనపడే పరిస్థితి వచ్చింది. కాంగ్రెస్ సర్కార్ వచ్చిన వెంటనే జిల్లాకు చెందిన వ్యవసాయశాఖ మంత్రి తుమ్మల నాగేశ్వరరావు ఈ ఇరిగేషన్ ప్రాజెక్టుపై దృష్టిపెట్టి ఇరిగేషన్ మంత్రి ఉత్తమ్కుమార్రెడ్డికి వివరించారు. డిప్యూటీ సీఎం మల్లుభట్టి విక్రమార్కతో పాటు రెవెన్యూ మంత్రి పొంగులేటి శ్రీనివాసరెడ్డి కూడా తుమ్మల నాగేశ్వరరావుతో కలిసి సీతారామా, సీతమ్మసాగర్ బ్యారేజీ విషయంపై యాక్షన్ ప్లాన్ మొదలుపెట్టారు. మూడు పంపుహౌస్లను అందుబాటులోకి తెచ్చి రాజీవ్సాగర్ కెనాల్ ద్వారా నాగార్జునసాగర్ ప్రాజెక్టు కెనాల్కు నీటిని అందించారు. గతేడాది ఆగస్టులోనే గోదావరి రివర్మేనేజ్మెంట్ బోర్డు, టెక్నికల్ అడ్వయిజరీ కమిటీలలో వాదనలు వినిపించి కాస్టు బెనిఫిట్ రేషియోపై కేంద్రం సంతృప్తి చెందేలా చర్యలు తీసుకున్నారు. దీనితో సీతారామ ప్రాజెక్టు డీపీఆర్కు అనుమతులపై ఆశలు రేకెత్తించారు. ఏన్కూర్ లింక్ కెనాల్ డిజైన్ చేసి మూడు ప్యాకేజీలకు టెండర్లు పిలిచారు. గత సర్కారు ఆలస్యం కారణంగా ఇప్పుడు రూ.19వేల కోట్లకు ప్రాజెక్టు ఖర్చు పెరిగింది.
భూసేకరణకు నోటిఫికేషన్
సీతమ్మసాగర్ బ్యారేజీ నిర్మాణంలో భాగంగా బ్యాక్వాటర్ నుంచి పరివాహక ప్రాంతాన్ని కాపాడేందుకు కరకట్టలు నిర్మించాల్సి ఉంది. ఎన్జీటీ ఆదేశాలతో ఆగిన పనులు తిరిగి షురూ అయ్యేలా భూసేకరణకు ప్రస్తుత సర్కార్ శ్రీకారం చుట్టింది. చర్ల మండలం దండుపేట(జీ) గ్రామంలో 34.25 ఎకరాల భూమిని సేకరించాలని నిర్ణయించింది. పట్టాభూమి28.03 ఎకరాలు, ప్రభుత్వం భూమి 6.25 ఎకరాలను సేకరిస్తున్నామని, అభ్యంతరాలు ఉంటే తెలపాలని భద్రాచలం సబ్ కలెక్టర్ ఆఫీసు నుంచి నోటిఫికేషన్ వచ్చింది. ఈ భూముల్లో మామిడి చెట్టు 1, జామచెట్టు 1, నిమ్మ చెట్టు 1, వేపచెట్టు 1, పొక్క చెట్లు 3, తాటిచెట్లు 128, టేకుచెట్లు 601, బావి 1, బోరుబావులు 9, పైపులైన్లు 7, షెడ్డు 1 ఉన్నాయి. మొత్తంగా 18 కట్టడాలు, 736 చెట్లకు పరిహారం ఇవ్వనున్నారు. ఒకవైపు అనుమతులు తెచ్చుకోవడంపై ప్రధానంగా దృష్టిసారించి, మరోవైపు అవసరమైన భూమిని సేకరించేందుకు సర్కారు సిద్ధమైంది.
