పెళ్లికి సంబంధించిన యాడ్స్ కొత్త పుంతలు తొక్కుతున్నాయి. ‘కండీషన్స్ అప్లై’ అంటూ వింత వింత షరతులను వధూవరుల తరఫు వాళ్లు పెడుతున్నారు. కొన్ని అర్హతలు, గుణాలు ఉన్నవారు మాత్రమే కావాలని తేల్చి చెబుతున్నారు. తాజాగా ఓ పత్రికలో పబ్లిష్ అయిన పెళ్లి యాడ్ ను చూస్తే ఆ విషయం అర్ధమైపోతుంది. ‘సాఫ్ట్‌వేర్‌ ఇంజినీర్స్ అయితే మాకొద్దు. దయచేసి ఇంజినీర్స్ మాకు కాల్ చేయొద్దు’ అని అందులో స్పష్టంగా పేర్కొన్నారు. ఈ మ్యాట్రిమోనియల్ యాడ్ తాజాగా పాపులర్‌ అయింది. ‘ధనిక వ్యాపార కుటుంబంలోని ఎంబీఏ పూర్తిచేసిన వధువుకు ఐఏఎస్‌/ఐపీఎస్‌, వైద్యుడు, పారిశ్రామికవేత్త, వ్యాపారవేత్త అయిన వరుడు కావాలి’ అని ఆ యాడ్ లో ఉంది. ఈ ప్రకటన చివరి వాక్యంలో.. ‘సాఫ్ట్‌వేర్‌ ఇంజినీర్లు కాల్ చేయొద్దు’ అని ప్రస్తావించారు.
Future of IT does not look so sound. pic.twitter.com/YwCsiMbGq2
— Samir Arora (@Iamsamirarora) September 16, 2022
అయితే ఈ యాడ్ కు సంబంధించిన క్లిప్పింగ్‌ను వ్యాపారవేత్త సమీర్‌ అరోరా ట్విటర్‌లో షేర్‌ చేశారు. ‘ఐటీ భవిష్యత్తు సజావుగా కనిపించడం లేదు’ అనే వ్యాఖ్యలను దీనికి జోడించారు. ప్రస్తుతం ఈ పోస్ట్‌ వైరల్‌గా మారింది. నెటిజన్లు కూడా దీనిపై కామెంట్ల వర్షం కురిపిస్తున్నారు. ‘ఐటీ లేకపోతే దేశ భవిష్యత్తు సరిగ్గా ఉండదు’’ అని మరో నెటిజన్ వ్యాఖ్యానించాడు. ‘మేం అంత చెడ్డవాళ్లమా’ అంటూ ఓ సాఫ్ట్‌వేర్‌ ఇంజినీర్‌ ఆవేదన వ్యక్తం చేశాడు.
