పెళ్లిళ్లు, ఫంక్షన్లు, పార్టీలు... దేనికి వెళ్లినా మాస్క్ ఉండాల్సిందే. అంతలా అందరి జీవితంలో కలిసిపోయిన మాస్క్లు స్టైల్ సింబల్ అవుతున్నాయి. అంతేకాదు సిచ్యుయేషన్కి మ్యాచ్ అయ్యే మాస్కులు పెట్టుకునే వాళ్ల సంఖ్య పెరుగుతోంది. అలాంటివే ఈ ‘ఫ్లోరల్ మాస్కులు’. పెళ్లికూతురు, పెళ్లికొడుకు కోసం
ప్రత్యేకంగా తయారుచేసిన ఈ పూల మాస్కులు మధురైలో దొరుకుతున్నాయి.
తమిళనాడులోని మధురైకి చెందిన మోహన్ అనే పూల వ్యాపారి. మీనాక్షి టెంపుల్ దగ్గర్లోని చిన్న పూల దుకాణంలో పెళ్లి దండలు అమ్ముతుంటాడు. లాక్డౌన్లో పెళ్లిళ్లు వాయిదా పడి పూలకి గిరాకీ లేకుండా పోయింది. ఇప్పుడిప్పుడే మళ్లీ పెళ్లిళ్ల సందడి షురూ కావడంతో తనవంతు ప్రయత్నంగా ‘అందరికీ కరోనా జాగ్రత్తలు చెప్పాలి’ అనుకున్నాడు. పూల దండలతో పాటు పెళ్లికూతురు, పెళ్లికొడుకు కోసం స్పెషల్గా మూడు పొరల ‘ఫ్లోరల్ మాస్క్లు’ కుట్టడం మొదలు పెట్టాడు. ఇలా ఎందుకంటే... ‘పెళ్లికొడుకు, పెళ్లికూతురు మాస్కులు పెట్టుకుంటే, పెళ్లికి వచ్చిన వాళ్లంతా మాస్కులు పెట్టుకుంటారు’ అనేది మోహన్ ఆలోచన. మూడు పొరలున్న ఈ మాస్కుల్ని.. మొదటి పొరలో క్లినికల్ మాస్క్, రెండో పొరలో మందార పూలు, మూడో పొరలో మల్లె మొగ్గలు, ఆకుని పేర్చి తయారుచేశాడు. అతడు అనుకున్నట్టుగానే ‘ఫ్లోరల్ మాస్క్లు’ నిజంగా మ్యాజిక్ చేస్తున్నాయి. పెళ్లి దండలు కొనేందుకు వచ్చిన వాళ్లు ఈ కలర్ఫుల్గా ఉన్న ఫ్లోరల్ మాస్కుల్ని చూసి ముచ్చటపడి మరీ కొంటున్నారు. మధురై చుట్టుపక్కల జరిగే పెళ్లి వేడుకల్లో కొత్తదంపతులు పూల మాస్కులు పెట్టుకుని మెరిసిపోతున్నారు.
