న్యూఢిల్లీ: ఇండియన్ ప్రీమియర్ లీగ్ (IPL) కోసం ఎదురు చూస్తోన్న క్రికెట్ ఫ్యాన్స్కు గుడ్ న్యూస్. ఐపీఎల్ 2026 సీజన్ మార్చి 28 నుంచి ప్రారంభం కానున్నట్లు తెలుస్తోంది. మే 31న ఫైనల్ మ్యాచ్ జరగనున్నట్లు సమాచారం. ఐపీఎల్ 2026 సీజన్ మార్చి 26న మొదలు అవుతుందని మొదట ప్రచారం జరిగిన విషయం తెలిసిందే.
అయితే.. ఈ ఏడాది సమ్మర్లో అస్సాం, తమిళనాడు, వెస్ట్ బెంగాల్ అసెంబ్లీ ఎన్నికలు జరగనున్నాయి. ఈ ఎన్నికల షెడ్యూల్ను ఈసీ ఇప్పటి వరకు ప్రకటించకపోవడంతో ఐపీఎల్ 2026 ప్రారంభం తేదీని మరో రెండు రోజులకు వాయిదా వేసినట్లు తెలుస్తోంది.
వచ్చే వారం ఐపీఎల్ గవర్నింగ్ కౌన్సిల్ సమావేశం జరగనుంది. ఈ భేటీలో ఐపీఎల్ షెడ్యూల్ను ఖరారు చేయనున్నారు. ఆ తర్వాత అధికారికంగా ఐపీఎల్ షెడ్యూల్ ప్రకటించే అవకాశం ఉంది. ఎన్నికల నేపథ్యంలో ఐపీఎల్ షెడ్యూల్ను ఈ సారి రెండు భాగాలుగా ప్రకటించనున్నట్లు సమాచారం.
