ఖైరతాబాద్, వెలుగు: జనాభా దామాషా ప్రకారం బీసీలకు ఎంపీ టికెట్లు కేటాయించాలని బీసీ సంక్షేమ సంఘం జాతీయ అధ్యక్షుడు శ్రీనివాస్గౌడ్ రాష్ట్ర ప్రభుత్వాన్ని డిమాండ్ చేశారు. సబ్బండ వర్గాలకు రాజకీయ వాటా దక్కినప్పుడే అసలైన సామాజిక న్యాయం జరిగినట్టు అన్నారు. మంగళవారం సోమాజిగూడ ప్రెస్క్లబ్లో ఆయన మీడియాతో మాట్లాడారు. బీసీలకు బీఆర్ఎస్6, బీజేపీ 5 సీట్లు ఇచ్చాయని, కాంగ్రెస్ అంతకంటే ఎక్కువ సీట్లు కేటాయించాలని కోరారు.
రాహుల్గాంధీ బీసీలకు పెద్దపీట వేయాలంటుంటే, రాష్ట్రంలో ఒకే సామాజిక వర్గానికి ప్రధాన్యం ఇస్తున్నారని అసహనం వ్యక్తం చేశారు. నామినేటెడ్పోస్టుల కేటాయింపులో బీసీలకు రావాల్సిన వాటాను ఎందుకు ఇవ్వలేదని, 5 శాతం లేని వారికి 90 శాతం పదవులు ఇవ్వడం న్యాయమా అంటూ సీఎం రేవంత్ను జాజుల ప్రశ్నించారు. బీఆర్ఎస్ ది దొరల పాలనైతే.. కాంగ్రెస్ ది పటేళ్ల పాలన అని విమర్శించారు. బీసీ కుల సంఘాల జేఏసీ చైర్మన్ కుందారం గణేష్చారి, విద్యార్థి సంఘాల జాతీయ అధ్యక్షుడు విక్రం గౌడ్ తదితరులు పాల్గొన్నారు.
