హైదరాబాద్, వెలుగు: పార్లమెంట్ ఎన్నికల్లో అనుసరించాల్సిన వ్యూహాలు, మెజారిటీ స్థానాల్లో గెలుపు, అభ్యర్థుల ఎంపికపై కాంగ్రెస్ పార్టీ వేగం పెంచింది. అసెంబ్లీ ఎన్నికల్లో గెలిచిన ఊపుతో.. లోక్సభ ఎలక్షన్లోనూ టార్గెట్ 17గా పెట్టుకుని పనిచేస్తున్నది. అందులో భాగంగా కాంగ్రెస్ పార్టీ వ్యూహకర్త సునీల్ కనుగోలు కూడా పార్టీకి వ్యూహాలను రచిస్తున్నట్టు తెలిసింది. ఈ నేపథ్యంలోనే శుక్రవారం అసెంబ్లీలో సీఎం రేవంత్ రెడ్డి, డిప్యూటీ సీఎం భట్టి విక్రమార్క, ఎమ్మెల్యే రాజగోపాల్ రెడ్డితో ఆయన విడివిడిగా భేటీ అయ్యారు.
రేవంత్తో గంట.. భట్టి, రాజగోపాల్రెడ్డితో అరగంటపాటు ఆయన చర్చలు జరిపారు. చర్చల్లో భాగంగా సునీల్ కనుగోలు తన సర్వే నివేదికలను రేవంత్, భట్టికి అందజేసినట్టు సమాచారం. దక్షిణ తెలంగాణలోని లోక్సభ సెగ్మెంట్లలో పార్టీ బలంగా ఉందని, ఎక్కువ సీట్లు గెలుచుకోవచ్చని సునీల్ కనుగోలు చెప్పినట్టు తెలిసింది. ఈ నేపథ్యంలోనే ఉత్తర తెలంగాణపైనా ఫోకస్ పెంచాల్సిందిగా సూచనలు చేశారని పార్టీ వర్గాల ద్వారా తెలుస్తున్నది. క్షేత్రస్థాయిలో ఇతర పార్టీల్లోని లోకల్ క్యాడర్ కాంగ్రెస్లోకి వచ్చేలా ప్రయత్నాలు చేస్తే పార్టీకి లాభమని ఆయన సూచించారని చెప్తున్నారు.
త్వరలో వార్ రూమ్ మీటింగ్స్..
ఎన్నికల్లో అనుసరించాల్సిన వ్యూహాలు, వాటి అమలు కు ఏఐసీసీ ఇప్పటికే వార్ రూమ్ను ఏర్పాటు చేసింది. చైర్మన్, సభ్యులనూ నియమించింది. ఈ నేపథ్యంలో త్వరలోనే గాంధీభవన్లో వార్ రూమ్ మీటింగ్స్నిర్వహించాలని సునీల్ కనుగోలు డిసైడ్ అయినట్టు తెలుస్తున్నది. అన్ని జిల్లాల సోషల్ మీడియా ఇన్చార్జ్లు, డీసీసీ చీఫ్లు, అసెంబ్లీ ఎన్నికల సమయంలో నియమించిన స్ట్రాటజీ కమిటీలు ఈ సమావేశంలో పాల్గొననున్నాయి. లోక్సభ ఎన్నికల కోసం సోషల్ మీడియాను బాగా వినియోగించుకోవాలని సునీల్ కనుగోలు సూచిస్తున్నట్టు తెలిసింది.
రాష్ట్రంలో కనీసం 15 సీట్లు గెలిచేలా ప్రణాళికలు తయారు చేసుకోవాల్సిందిగా దీపాదాస్ మున్షీ పార్లమెంట్ అబ్జర్వర్లకు సూచించినట్టు సమాచారం. శుక్రవారం గాంధీభవన్ వార్ రూమ్ నుంచి ఆమె పార్లమెంట్ అబ్జర్వర్లతో టెలీ కాన్ఫరెన్స్ నిర్వహించారు. 70 రోజుల్లోనే 25 వేల ఉద్యోగాలిచ్చిన విషయాన్ని క్షేత్రస్థాయిలోకి తీసుకెళ్లాల్సిందిగా ఆమె వారికి సూచించినట్టు తెలిసింది.
