- అబిడ్స్లో అంతర్రాష్ట్ర ముఠాకు చెందిన మైనర్ అరెస్ట్
అబిడ్స్, వెలుగు: విశాఖపట్నం నుంచి ఢిల్లీకి గంజాయి తరలిస్తున్న అంతర్రాష్ట్ర ముఠాకు చెందిన ఓ మైనర్ను అబిడ్స్ పోలీసులు సోమవారం అరెస్ట్ చేశారు. రూ.24.50 లక్షల విలువైన 48 కిలోల పొడి గంజాయిని స్వాధీనం చేసుకున్నారు. వివరాలను హైదరాబాద్ సిటీ టాస్క్ఫోర్స్ డీసీపీ వైభవ్ గైక్వాడ్ రఘునాథ్ వెల్లడించారు.
ఇంటర్మీడియట్ చదివి బ్లింకిట్ డెలివరీ బాయ్గా పని చేస్తున్న బిహార్కు చెందిన ఈ మైనర్, ఆర్థిక ఇబ్బందుల కారణంగా సులభంగా డబ్బు సంపాదించాలనే దురాశతో చిన్ననాటి మిత్రుడు అంకిత్ కుమార్తో కలిసి ఈ అక్రమ రవాణాకు పాల్పడ్డాడు.
విశాఖపట్నంలో నౌషద్, రాజేశ్ల వద్ద కొనుగోలు చేసిన గంజాయిని 24 ప్యాకెట్లుగా చేసి బ్రీఫ్ కేసులు, ఎయిర్ బ్యాగ్లలో నింపి ఢిల్లీకి తరలిస్తుండగా.. నాంపల్లి స్టేషన్ రోడ్డులో పోలీసులు పట్టుకున్నారు. ఈ ముఠాకు ప్రధాన సూత్రధారులైన ఢిల్లీకి చెందిన బండియా, విశాఖకు చెందిన నౌషద్, రాజేశ్, బిహార్కు చెందిన అంకిత్ కుమార్ పరారీలో ఉన్నారు. కేసు దర్యాప్తు చేస్తున్నట్లు పోలీసులు తెలిపారు.
