న్యూఢిల్లీ: పిటిషన్ పేపర్లలో పిటిషన్ దారుడి కులం, మతం వివరాలను ప్రస్తావించే పద్ధతిని ఆపేయాలని దేశంలోని అన్ని హైకోర్టులను సుప్రీంకోర్టు సోమవారం ఆదేశించింది. సుప్రీంకోర్టు న్యాయమూర్తులు జస్టిస్ హిమా కోహ్లీ, జస్టిస్ అహ్సానుద్దీన్ అమానుల్లాలతో కూడిన ధర్మాసనం ఈ ఉత్తర్వులు ఇచ్చింది.
పిటిషన్ కాపీలో కులం, మతం వివరాలను ప్రస్తావించడంలో అర్థం లేదని పేర్కొంది. వివాహ వివాదానికి సంబంధించిన ఓ కేసు రాజస్థాన్‌లోని ఫ్యా మిలీ కోర్టులో పెండింగ్‌లో ఉంది. తమ కేసు విచారణను పంజాబ్‌లోని ఫ్యామిలీ కోర్టుకు బదిలీ చేయాలని కోరుతూ దంపతులు సుప్రీంను ఆశ్రయించారు.
వారి పిటిషన్లలో కులం పేరు ఉండటాన్ని చూసి సుప్రీం బెంచ్ ఆశ్చర్యం వ్యక్తం చేస్తూ.. కులం వివరాలను ఎందుకు ప్రస్తావించారని ప్రశ్నించింది. ఇకపై ఏ కోర్టులోనూ కేసుల పిటిషన్ కాపీలలో కులం , మతం ప్రస్తావన లేకుండా చూసుకోవాలని హైకోర్టులకు సుప్రీం కోర్టు స్పష్టం చేసింది. పిటిషనర్ల రిక్వె స్ట్ మేరకు వారి కేసు విచారణను పంజాబ్‌కు బదిలీ చేసింది.
