న్యూఢిల్లీ: లొంగిపోవడానికి మరింత టైమ్ కావాలంటూ బిల్కిస్ బానో కేసు దోషులు వేసిన పిటిషన్లను సుప్రీంకోర్టు తోసిపుచ్చింది. వాటికి విచారణార్హతలేదని జస్టిస్ బీవీ నాగరత్న, జస్టిస్ ఉజ్జల్ భుయాన్‌‌లతో కూడిన ధర్మాసనం తేల్చిచెప్పింది. ఆదివారం నాటికి వారంతా జైలు అధికారుల ముందు లొంగిపోవాల్సిందేనని ఆదేశించింది.
2002లో గోధ్రా రైలు దహనకాండ అనంతరం గుజరాత్‌‌లో అల్లర్లు చెలరేగిన విషయం తెలిసిందే. ఈ అల్లర్లలో బిల్కిస్ బానో కుటుంబానికి చెందిన ఏడుగురిని దుండగులు హత్య చేశారు. ఐదు నెలల గర్భిణి బానోపై సామూహిక అత్యాచారానికి పాల్పడ్డారు. ఈ కేసులో 11 మంది దోషులు15 ఏండ్లు జైలులో గడిపారు. గుజరాత్ ప్రభుత్వం వీరికి రెమిషన్ ప్రసాదించడంతో 2022 ఆగస్టు15న జైలు నుంచి విడుదలయ్యారు.
