- కిలో గంజాయిని తరలిస్తూ 2014లో తంగరాజు అరెస్టు
- అతడిపై నేరం నిరూపితమైందన్న అక్కడి హోం మంత్రిత్వ శాఖ
- ఆగ్రహం వ్యక్తం చేసిన యునైటెడ్ నేషన్స్, మానవ హక్కుల సంఘాలు
- గంజాయి స్మగ్లింగ్ కేసులో శిక్ష అమలు చేసిన ప్రభుత్వం
- ఆగ్రహం వ్యక్తం చేసిన యునైటెడ్ నేషన్స్, మానవ హక్కుల సంఘాలు
సింగపూర్: గంజాయి స్మగ్లింగ్ కేసులో భారత సంతతికి చెందిన తంగరాజు సుప్పయ్య(46)కు సింగపూర్ ప్రభుత్వం బుధవారం ఉరిశిక్ష అమలు చేసింది. అతనితోపాటు అతని కుటుంబం, మానవ హక్కుల కార్యకర్తలు, యునైటెడ్ నేషన్స్ క్షమాభిక్ష కోరినప్పటికీ సర్కారు వినిపించుకోలేదు. కోర్టులో తుది విచారణ ముగిసిన ఒకరోజు తర్వాత తంగరాజును చాంగి జైలు కాంప్లెక్స్లో ఉరి తీసినట్లు సింగపూర్ ప్రిజన్ సర్వీస్ అధికారులు ప్రకటించారు. అతని మరణ ధ్రువీకరణ పత్రం అందిందని తంగరాజు సోదరి లీలావతి సుప్పయ్య తెలిపారు. తంగరాజు చేసిన నేరం నిరూపితమైందని సింగపూర్ హోం వ్యవహారాల మంత్రిత్వ శాఖ అంతకుముందే పేర్కొంది. డ్రగ్స్ సప్లయ్కి అతను రెండు ఫోన్లను వాడినట్లు పోలీసులు నిర్ధారించారు. తన కేసును సమీక్షించి, ఉరిశిక్ష నిలిపివేయాలని తంగరాజు చేసిన తుది విజ్ఞప్తిని సింగపూర్ కోర్టు మంగళవారం కొట్టివేసింది. ఈ కేసును పున:సమీక్షించేందుకు, ఉరిని ఆపేందుకు కావాల్సిన న్యాయమైన ప్రతిపాదనలను చూపడంలో తంగరాజు విఫలమయ్యారని జస్టిస్ చోంగ్ తన తీర్పులో వెల్లడించారు.
కిలో గంజాయి స్మగ్లింగ్ చేసిండని కేసు..
సింగపూర్లో ఉంటున్న భారత సంతతికి చెందిన తంగరాజు 2014లో అరెస్ట్ అయ్యాడు. ఒక కిలో గంజాయిని అక్రమంగా తరలిస్తున్నాడని కేసు నమోదైంది. ఈ కేసును విచారించిన సింగపూర్ కోర్టు 2018 అక్టోబర్ 9న తంగరాజును దోషిగా తేల్చింది. ఇంకో ఇద్దరితో కలిసి గంజాయి రవాణా కు సహకరించాడని నిర్ధారిస్తూ అతడికి మరణ శిక్ష విధించింది. అయితే, హక్కుల ప్రమాణాలకు అనుగుణంగా ఈ కేసు విచారణ జరగలేదని జెనీవాకు చెందిన గ్లోబల్ కమిషన్ ఆన్ డ్రగ్ పాలసీ సభ్యుడు రిచర్డ్ తన బ్లాగ్లో ఇటీవల ఆరోపించారు. తంగరాజును అరెస్ట్ చేస్తున్నప్పుడు డ్రగ్స్ ఎక్కడా లేవని, ఆ దేశం ఓ అమాయకుడి ప్రాణాలు తీయబోతోందని పేర్కొన్నారు. దీంతో ఇంటర్నేషనల్ సంఘాల నుంచి కూడా సింగపూర్ ప్రభుత్వంపై విమర్శలు వచ్చాయి. ఈయూ, ఆస్ట్రేలియా దేశాలు సైతం తంగరాజకు మద్దతుగా నిలిచాయి. ఈయూ సభ్య దేశాలు, నార్వే, స్విట్జర్లాండ్ దేశాలు కలిసి ఓ ప్రకటన విడుదల చేశాయి. తంగరాజు ఉరి శిక్షను నాన్ కేపిటల్ శిక్షగా మార్చాలని కోరాయి. జీవించే హక్కును గౌరవించాలని కోరాయి.
చట్ట ప్రకారమే నడుచుకున్నం: సింగపూర్
రిచర్డ్ ప్రకటనపై స్పందించిన సింగపూర్ హోం మంత్రిత్వ శాఖ.. ఆయన కామెంట్లు తమ దేశ న్యాయవ్యవస్థను కించపరిచేలా ఉన్నాయని మండిపడింది. డ్రగ్స్ కు సంబంధించి స్థానిక చట్టాల ప్రకారమే ఉరి అమలు చేస్తున్నామని ప్రకటించింది.
