న్యూఢిల్లీ, వెలుగు: స్కిల్, ఎడ్యుకేషన్కు తెలంగాణ హబ్గా మారుతోందని రాష్ట్ర ఉన్నత విద్యా మండలి (టీఎస్సీహెచ్ఈ) వైస్ చైర్మన్, ఆర్జీయూకేటీ బాసర వైస్ చాన్స్ లర్ ప్రొఫెసర్ వెంకట రమణ అన్నారు. గురువారం ఢిల్లీలో ఇండియా డిడాక్టిక్స్ అసోసియేషన్ ఆధ్వర్యంలో ‘ఎమర్జింగ్ వికసిత్ భారత్–2047’ సదస్సు నిర్వహించారు. ఈ కార్యక్రమానికి రాష్ట్రం నుంచి వెంకట రమణ హాజరయ్యారు.
‘హయ్యర్ ఎడ్యుకేషన్ పాలసీ ఎక్స్చేంజ్’ అంశంలో చేపట్టిన రౌండ్ టేబుల్ చర్చలో ప్యానలిస్ట్ గా ఆయన పాల్గొన్నారు. తెలంగాణ ప్రభుత్వం స్కిల్ యూనివర్సిటీల ఏర్పాటుకు బడ్జెట్లో నిధులు కేటాయించిందని తెలిపారు. ఈ నిర్ణయంతో వర్సిటీల్లో క్వాలిటీ, స్కిల్ ఎడ్యుకేషన్ అందించేందుకు అవకాశం లభిస్తుందని చెప్పారు. విద్యార్థులకు అవకాశాలను కల్పించడం, పారిశ్రామికవేత్తలుగా మార్చడానికి శిక్షణ అవసరమన్నారు. ప్రముఖ వర్సిటీల ప్రొఫెసర్ల ఎక్స్చేంజ్ తో నైపుణ్య అభివృద్ధి జరుగుతుందని అభిప్రాయపడ్డారు.
