- సోషల్ మీడియాలో పోటాపోటీగా అవినీతి ఆరోపణలు
- ‘బుక్ మై సీఎం’ పేరుతో కాంగ్రెస్ క్యాంపెయిన్
- ‘స్కాంగ్రెస్’ పేరుతో బీఆర్ఎస్ కౌంటర్
హైదరాబాద్, వెలుగు : కాంగ్రెస్, బీఆర్ఎస్ మధ్య సోషల్ మీడియాలో పోస్టుల వార్ నడుస్తోంది. ‘మీది కమీషన్ల పార్టీ’ అంటూ బీఆర్ఎస్ పై కాంగ్రెస్ ఆరోపణలు చేస్తుంటే, ‘మీది స్కామ్ ల పార్టీ’ అంటూ కాంగ్రెస్ పై బీఆర్ఎస్ ఆరోపణలు చేస్తోంది. బీఆర్ఎస్ అవినీతికి పాల్పడిందంటూ ‘బుక్మై సీఎం’ పేరుతో కాంగ్రెస్ ఇప్పటికే ప్రచారం ప్రారంభించింది. దాన్ని సోషల్ మీడియా వేదికగా జనాల్లోకి తీసుకెళ్తున్నది. బీఆర్ఎస్ అంటే కమీషన్ల పార్టీ అని, కల్వకుంట్ల కుటుంబంలోని వాళ్లంతా కమీషన్లు లేనిదే పనులు చేయరని ఆరోపిస్తున్నది.
దీనికి కౌంటర్ గా కాంగ్రెస్ పై బీఆర్ఎస్ కూడా ఎదురుదాడి మొదలుపెట్టింది. ‘స్కాంగ్రెస్’ పేరుతో ప్రచారం ప్రారంభించింది. స్కామ్లకే పెద్దన్న కాంగ్రెస్ అని, ఆ పార్టీ ప్రకటించిన ఆరు గ్యారంటీలు డొల్ల అని విమర్శలు చేస్తున్నది.
బీఆర్ఎస్.. కమీషన్ల పార్టీ: కాంగ్రెస్
‘‘బుక్ మై సీఎం.. 30% కమీషన్ మస్ట్’ అంటూ బీఆర్ఎస్ ప్రభుత్వంపై కాంగ్రెస్ ప్రచారం మొదలుపెట్టింది. దళితబంధు, కల్యాణలక్ష్మి, డబుల్బెడ్రూం ఇండ్లు సహా ఏ పథకం తీసుకున్నా.. ఎమ్మెల్యేలకు కమీషన్లు ముట్టజెప్పాల్సిందేనంటూ ఆరోపణలు చేసింది.
‘దళితబంధు స్కామ్ 2023’ పేరుతో పోస్టర్ను రూపొందించిన కాంగ్రెస్.. ఆ పథకం అందాలంటే 30 శాతం కమీషన్ను కల్వకుంట్ల కుటుంబం ఖాతాలో వేయాలని అందులో పేర్కొంది. డబ్బులు జమ చేసేందుకు కేటీఆర్పే, కవిత పే, హరీశ్రావు పే, సంతోష్రావు పే అంటూ అందులో ప్రచురించింది. దాంతో పాటు కేసీఆర్ అంటే కె. కమీషన్రావు అని మరో పోస్టు పెట్టింది. కేసీఆర్ ఇచ్చిన హామీలన్నీ మోసమేనని ప్రా‘మిస్’ పేరుతో ఇంకో పోస్టర్ తయారు చేసింది. నిరుద్యోగ భృతి, రైతు రుణమాఫీ, దళిత ముఖ్యమంత్రి, దళితులకు మూడెకరాల భూమి, మైనారిటీలకు 12% రిజర్వేషన్లు, ఇంటికో ఉద్యోగం బూటకమని అందులో పేర్కొంది. బీఆర్ఎస్ స్కామ్టికెట్లు 30 శాతం కమీషన్తో అందుబాటులో కలవంటూ మరో పోస్టర్ను సోషల్మీడియాలో పోస్టు చేసింది.
కాంగ్రెస్.. స్కామ్ల పార్టీ: బీఆర్ఎస్
కాంగ్రెస్‘బుక్మై సీఎం క్యాంపెయిన్’కు బీఆర్ఎస్కూడా దీటుగా కౌంటర్ ఇస్తున్నది. ‘ది రేవంత్ స్టోరీ’ పేరుతో రూ.50 లక్షల స్కామ్2015 అంటూ ప్రచారం షురూ చేసింది. డబ్బు సూట్కేసులతో రేవంత్ఉన్న ఫొటోను పెట్టి.. ఓటుకు నోటు కేసును మళ్లీ తెరపైకి తెచ్చింది. 2008 నుంచి కాంగ్రెస్ చేసిన స్కామ్ లు ఇవీ అంటూ ‘స్కాంగ్రెస్’ పేరుతో మరో పోస్టర్ను బీఆర్ఎస్ సోషల్ మీడియా సెల్ ట్విట్టర్ లో పోస్టు చేసింది. 2008లో 2జీ స్కామ్, 2009లో సత్యం స్కామ్, 2010లో కామన్వెల్త్ గేమ్స్కామ్, 2011లో ఓటుకు నోటు కుంభకోణం, 2012లో కోల్స్కామ్, చాపర్ స్కామ్, టాట్రా ట్రక్స్కామ్, ఆదర్శ్ స్కామ్, 2013లో ఐపీఎల్స్కామ్అంటూ అందులో పేర్కొంది.
మరోవైపు కాంగ్రెస్ ఇటీవల ప్రకటించిన ఆరు గ్యారంటీలపైనా విమర్శలు గుప్పించింది. రోజు 3 గంటల కరెంట్, నాలుగు వారాలకోసారి నల్లా నీళ్లు, ఆరు నెలలకో సీఎం, నెలకు నాలుగు సార్లే స్కూళ్లు, అన్ని వేళలా అవినీతి చట్టబద్ధం, భూ కబ్జాలో పారదర్శకత అంటూ కాంగ్రెస్పై బీఆర్ఎస్ ఎదురు దాడి చేసింది.
మంత్రి కమలాకర్ పై 9 ఆరోపణలతో కాంగ్రెస్ చార్జిషీట్
రోజుకో మంత్రిపై కాంగ్రెస్ పార్టీ చార్జిషీట్లను రిలీజ్ చేస్తున్నది. గురువారం మంత్రి తలసాని శ్రీనివాస్ యాదవ్పై ‘దందాల తలసాని’ అంటూ చార్జిషీట్ రిలీజ్ చేసిన ఆ పార్టీ.. శుక్రవారం మంత్రి గంగుల కమలాకర్పై ‘కన్నింగ్కమలాకర్’ పేరిట చార్జిషీట్ విడుదల చేసింది. ఆయనపై 9 అభియోగాలను మోపింది.