- 12 జిల్లాల్లో ప్రమోషన్ పోస్టుల్లో అడ్జెస్ట్మెంట్
- మల్టీజోన్, జోన్ ఇష్యూతో 188 అప్పీల్స్ పెండింగ్
- బ్లాక్ చేసిన13 జిల్లాల్లో ఎస్జీటీలకు చాన్స్ లేనట్టే
హైదరాబాద్, వెలుగు: ఏడాదిగా స్పౌజ్ టీచర్లు చేస్తున్న ఆందోళనలకు కొంత ఫలితం దక్కింది. బ్లాక్ చేసిన 13 జిల్లాల్లో 615 మంది స్కూల్ అసిస్టెంట్ల బదిలీలకు అనుమతి ఇస్తూ స్కూల్ ఎడ్యుకేషన్ డైరెక్టర్ శ్రీదేవసేన గురువారం ఉత్తర్వులు జారీ చేశారు. వీరిలో 12 జిల్లాల్లోని 427 మంది స్కూల్ అసిస్టెంట్ల అప్పీళ్లను అధికారులు పరిష్కరించి పోస్టింగ్లు ఇచ్చారు. అత్యధికంగా మహబూబ్ నగర్, రంగారెడ్డి, కరీంనగర్ జిల్లాల నుంచి బదిలీలు ఉన్నట్టు తెలిసింది. సూర్యాపేట జిల్లాలో ఎవరూ దరఖాస్తు చేయకపోవడంతో అక్కడ బదిలీలు చేయలేదు. మల్టీజోన్, జోన్ ఇష్యూతో 188 అప్పీల్స్ పెండింగ్లో పెట్టారు. గతేడాది డిసెంబర్లో 317 జీవో ద్వారా జిల్లాలు అలాట్ కాగా, 13 జిల్లాల్లో మాత్రం డైరెక్ట్ రిక్రూట్మెంట్ పోస్టులకు ఇబ్బంది అవుతుందనే కారణంతో స్పౌజ్ బదిలీలు చేయలేదు. ఏడాది కాలంగా వారంతా వివిధ రూపాల్లో ఆందోళనలు చేస్తూవస్తున్నారు. ఈ నేపథ్యంలో డైరెక్ట్ రిక్రూట్మెంట్ కు ఇబ్బంది లేకుండా 12 జిల్లాల్లో స్కూల్ అసిస్టెంట్ ప్రమోషన్ పోస్టుల్లో స్పౌజ్ టీచర్లను ఇప్పుడు అడ్జెస్ట్ చేశారు. దీంతో ఆయా జిల్లాల్లో కొత్తగా చేరిన పలు సబ్జెక్టుల టీచర్లకు ప్రమోషన్లు పొందే అవకాశం లేకుండా పోయింది.
సర్కార్ క్లారిటీ వచ్చిన తర్వాతే..
మల్టీజోన్, జోన్ ఇష్యూతో 188 అప్పీల్స్ పెండింగ్లో పెట్టారు. ప్రస్తుతం స్పౌజ్ దరఖాస్తు పెట్టుకున్నవారిలో భర్త లేదా భార్య మల్టీజోన్/జోన్ పరిధిలో పనిచేస్తున్నారు. జోన్లలో పనిచేస్తున్న భార్య లేదా భర్త వేరే జిల్లాకు బదిలీ అయితే, స్పౌజ్ కేటగిరిలో వీరిని ట్రాన్స్ఫర్ చేసి ఏం ప్రయోజనం అనే దానిపై స్కూల్ ఎడ్యుకేషన్ అధికారులు సర్కారును క్లారిటీ కోరారు. అక్కడి నుంచి వచ్చే స్పందనను బట్టి వాటిపై నిర్ణయం తీసుకునే అవకాశముంది. వంద శాతం డైరెక్ట్ రిక్రూట్మెంట్ ద్వారా భర్తీ అయ్యే ఎస్జీటీ స్పౌజ్ అప్పీళ్లపై సర్కారు ఏ నిర్ణయం తీసుకోలేదు. వారికి భవిష్యత్లోనూ బదిలీ అవకాశం కల్పించే చాన్స్ లేనట్టు తెలుస్తోంది. అయితే వారికి డిప్యుటేషన్పై కొంతకాలం కోరుకున్న జిల్లాల్లో పనిచేసే అవకాశం ఇవ్వాలని సర్కారు భావిస్తోంది. మరోవైపు 12 జిల్లాల్లో 70% ప్రమోషన్ వెకెన్సీల్లో స్పౌజ్ టీచర్లను నింపడంపై ఆయా జిల్లాల టీచర్ల నుంచి కొంత వ్యతిరేకత వస్తోంది. స్పెషల్ కోటా కింద వారిని తీసుకురావాలి గానీ, తమకొచ్చే ప్రమోషన్ల నుంచి ఇవ్వడం ఏమిటని వారు ప్రశ్నిస్తున్నారు.
