- తెలంగాణ పెట్రోలియం డీలర్స్ అసోసియేషన్ డిమాండ్
హైదరాబాద్సిటీ,వెలుగు: రాష్ట్రవ్యాప్తంగా గత మూడు వారాలుగా చాలా జిల్లాల్లో డీలర్లు ఇచ్చే ఇండెంట్లకు అనుగుణంగా పెట్రోల్, డీజిల్ సరఫరా కావడం లేదని తెలంగాణ పెట్రోలియం డీలర్స్ అసోసియేషన్ ఆందోళన వ్యక్తం చేసింది. డీలర్ల అవసరాలకు అనుగుణంగా తక్షణమే ఇంధన సరఫరాను పునరుద్దరించాలని అసోసియేషన్ అధ్యక్షుడు మర్రి అమరేందర్రెడ్డి శనివారం ఒక ప్రకటనలో పెట్రోలియం మంత్రిత్వశాఖ, ఆయిల్ కంపెనీలకు విజ్ఞప్తి చేశారు.
దేశానికి సేవలందిస్తున్న లక్షకుపైగా రిటైల్ ఔట్ లెట్ల కొనసాగింపు కోసం డీలర్ల పెరిగిన మూలధన అవసరాలను ప్రభుత్వం పరిగణనలోకి తీసుకోవాలని ఆయన కోరారు. ఆయిల్ కంపెనీలు కూడా డీలర్ల ఆర్ధిక పరిస్థితిని దృష్టిలో ఉంచుకుని క్రెడిట్ సౌకర్యాన్ని కొనసాగించాలన్నారు. పెట్రోల్, డీజిల్ ధరల పెరుగుదలతో డీలర్లు అదే స్థాయిలో రోజువారీ నిల్వలను కొనసాగించడానికి చిన్న, మధ్య తరగతి ఔట్లెట్లపై తీవ్రమైన ఆర్థిక భారం మోపుతున్నారని తెలిపారు.
