హైదరాబాద్, వెలుగు: అక్టోబర్ 28 శుక్రవారం నుంచి తెలంగాణ రాష్ట్ర అర్హత పరీక్ష (టీఎస్ సెట్–2023) ప్రారంభం కానుంది. ఈ నెల 28 నుంచి 30 వరకు మూడు రోజుల పాటు ఆరు సెషన్లలో ఆన్లైన్లో ఎగ్జామ్స్ జరగనున్నాయి. టీఎస్ సెట్ కు మొత్తం 40,838 మంది అటెండ్ కానున్నారు. ఇందులో అబ్బాయిలు 18,091 మంది ఉండగా, అమ్మాయిలు 22,746 మంది, ట్రాన్స్ జెండర్ ఒకరున్నారు. కాగా, ప్రతి రోజూ ఉదయం 9 గంటల నుంచి మధ్యాహ్నం 12 గంటల వరకు, మధ్యాహ్నం 2 గంటల నుంచి సాయంత్రం 5 గంటల వరకు రెండు సెషన్లలో ఎగ్జామ్స్ నిర్వహిస్తామని టీఎస్ సెట్ మెంబర్ సెక్రటరీ మురళీకృష్ణ తెలిపారు.
తెలంగాణలో హైదరాబాద్, ఆదిలాబాద్, కరీంనగర్, ఖమ్మం, మహబూబ్నగర్, నల్గొండ, నిజామాబాద్, వరంగల్ జిల్లాల్లో, ఏపీలో కర్నూలు, తిరుపతి, విజయవాడ, విశాఖపట్నం జిల్లాల్లో పరీక్ష కేంద్రాలను ఏర్పాటు చేసినట్టు ఆయన వెల్లడించారు. ఇప్పటికే హాల్ టికెట్లు వెబ్ సైట్లో అందుబాటులో ఉంచామని, అభ్యర్థులు డౌన్లోడ్ చేసుకోవాలని ఆయన సూచించారు. అయితే, ఎగ్జామ్స్ వాయిదా వేయాలని కొందరు కోరినా, ఈ పరీక్ష వల్ల ఇతర ఏ ఎగ్జామ్స్ కు ఇబ్బంది లేకపోవడంతో కంటిన్యూ చేస్తున్నట్టు చెప్పారు. నవంబర్ లాస్ట్ వీక్లో ఫలితాలు రిలీజ్ చేస్తామని మురళీకృష్ణ వెల్లడించారు.
