- టీఆర్ఎస్, బీఆర్ఎస్కు భయపడబోమని వెల్లడి
- ప్రజలకు భయపడి బీఆర్ఎస్ అంటూ రాష్ట్రాన్ని విడిచివెళ్లేందుకు ప్లాన్
- జాతీయ నేతలు కేసీఆర్కు మద్దతివ్వలేదని కామెంట్
హైదరాబాద్, వెలుగు: జాతీయ పార్టీ అంటూ సీఎం కేసీఆర్ కలలు కంటున్నారని బీజేపీ రాష్ట్ర వ్యవహారాల ఇన్చార్జ్ తరుణ్ చుగ్ మండిపడ్డారు. కొందరు నిద్రలో కలలు కంటే.. కేసీఆర్ మాత్రం పగటి కలలు కంటున్నారని ఎద్దేవా చేశారు. ఆ కలలు ఎన్నటికీ నెరవేరవన్నారు. మంగళవారం ఆయన బీజేపీ స్టేట్ ఆఫీసులో మీడియాతో మాట్లాడారు. టీఆర్ఎస్, బీఆర్ఎస్కు బీజేపీ భయపడదన్నారు. రాష్ట్ర ప్రజలకు భయపడే సీఎం కేసీఆర్.. బీఆర్ఎస్ అంటూ రాష్ట్రాన్ని విడిచి వెళ్లేందుకు సిద్ధమయ్యారన్నారు. రాష్ట్రాన్ని కాపాడాల్సింది పోయి భ్రష్టు పట్టించారని ఫైర్ అయ్యారు. ముందు సీఎంగా బాధ్యతలను నిర్వర్తించాలని, ఆ తర్వాత ప్రధాని అవ్వాలన్న కలలు కనాలని సూచించారు. మద్దతు కోసం కేజ్రీవాల్, మమత బెనర్జీ, దేవె గౌడ, అఖిలేశ్ యాదవ్ తదితరులను కలిసినా.. కేసీఆర్కు ఎవరూ మద్దతివ్వలేదన్నారు. ఈ ఎనిమిదేండ్లలో ప్రజలకు కేసీఆర్ ప్రభుత్వం ఏం చేసిందని ప్రశ్నించారు. ఇచ్చిన హామీలను నెరవేర్చకుండా కొత్త హామీలతో ప్రజల ముందుకు ఎలా వెళ్తారన్నారు. హామీలు నెరవేర్చకుండా మోసం చేసింది కేసీఆర్ కాదా అని నిలదీశారు. ఉద్యోగాలివ్వలేదని, డబుల్ బెడ్రూం ఇండ్లను పంపిణీ చేయలేదని, దళితబంధు ఇవ్వలేదని విమర్శించారు. ఆ హామీలపై చర్చకు తాము సిద్ధమని, కేసీఆర్ సిద్ధమా అని సవాల్ విసిరారు. రాష్ట్రంలో ప్రజలు బీజేపీని కోరుకుంటున్నారని, వచ్చే ఎన్నికల్లో బీజేపీదే అధికారమని
తరుణ్ చుగ్ స్పష్టం చేశారు.
లక్షలాది మందితో భారీ సభ
వచ్చే నెల 2, 3వ తేదీల్లో హైదరాబాద్లో నిర్వహించతలపెట్టిన బీజేపీ జాతీయ కార్యవర్గ సమావేశాల్లో భాగంగా భారీ సభను నిర్వహించాలని నిర్ణయించారు. సమావేశాలకు ప్రధాని మోడీ, హోం మంత్రి అమిత్ షాలు వస్తుండడంతో సభకు కనీసం 10 లక్షల మందిని తీసుకురావడం మీద ఫోకస్ పెట్టాలని పార్టీ నేతలకు తరుణ్ చుగ్ సూచించారు. మంగళవారం జరిగిన పార్టీ ఆఫీస్ బేరర్ల సమావేశంలో ఆయన పాల్గొన్నారు. సభను పరేడ్ గ్రౌండ్స్లో పెట్టాలా? లేదా వేరే ప్రాంతంలో నిర్వహించాలా? అన్న విషయం మీదా చర్చలు జరుగుతున్నాయి. దీనిపై మరో రెండు మూడు రోజుల్లో క్లారిటీ రానుంది. హైదరాబాద్లోని వివిధ రాష్ట్రాల ప్రజలతో.. సమావేశానికి వచ్చే ఆయా రాష్ట్రాల సీఎంలు, కేంద్ర మంత్రులు ప్రత్యేక సమావేశం నిర్వహించాలని నిర్ణయించారు. సమావేశాల
ఏర్పాట్లపై చర్చించేందుకు పార్టీ ఆఫీసులోని బోర్డు రూంను ప్రత్యేక ఆఫీసుగా ఏర్పాటుచేశారు. లక్ష్మణ్ నేతృత్వంలో పనిచేసే ఆ ఆఫీసును చుగ్ ప్రారంభించారు. రాజ్యసభ సభ్యుడిగా ఎన్నికైన లక్ష్మణ్ను ఆయన సన్మానించారు. సమావేశం కోసం ఏర్పాటు చేసిన 34 కమిటీలతోనూ తరుణ్ చుగ్ సమావేశమయ్యారు.
వచ్చే నెల 1నే హైదరాబాద్కు నడ్డా రాక
జాతీయ కార్యవర్గ సమావేశాల కోసం జులై ఒకటో తేదీనే హైదరాబాద్కు బీజేపీ జాతీయ అధ్యక్షుడు జేపీ నడ్డా రానున్నారు. బీజేపీ పాలిత రాష్ట్రాల సీఎంలు, కేంద్ర మంత్రులు, ఎంపీలు, ఇతర జాతీయ నేతలు మాత్రం ఈ నెల 28నే వస్తారు. వీళ్లంతా తమకు కేటాయించిన నియోజకవర్గాల్లో నాలుగు రోజుల పాటు పర్యటించనున్నారు. సమావేశాలు విజయవంతం అవ్వాలని ఈ నెల 28న రాష్ట్రమంతా ప్రత్యేక పూజలు చేయనున్నారు. కాగా, సమావేశాల కోసం పార్టీనేతలే ఖర్చు పెట్టుకోవాలని తీర్మానించారు. ప్రతి ఆఫీస్ బేరర్ రూ.లక్ష, పార్టీ జిల్లా అధ్యక్షులు, జిల్లా ఇన్చార్జులు రూ.50 వేలు, జిల్లా స్థాయి ఆఫీస్ బేరర్లు రూ.20 వేలు, పార్టీ కార్యకర్తలు రూ.వెయ్యి చొప్పున పార్టీకి అందించాలని డిసైడ్ చేశారు.
