- సెల్ఫోన్లు, ఎలక్ట్రానిక్ డివైజ్లను అనుమతించొద్దు
- కలెక్టర్లు, పోలీసు కమిషనర్లు, ఎస్పీలతో మంత్రి వీడియో కాన్ఫరెన్స్
హైదరాబాద్, వెలుగు: టెన్త్ హిందీ పేపర్ లీక్ కాలేదని, స్టూడెంట్స్ ఆందోళన చెందొద్దని విద్యాశాఖ మంత్రి సబితా ఇంద్రారెడ్డి అన్నారు. విధి నిర్వహణలో నిర్లక్ష్యం వహించే వారిని ఉపేక్షించేది లేదని హెచ్చరించారు. పరీక్షల నిర్వహణలో అక్రమాలకు పాల్పడే ఉద్యోగులను.. జాబ్ల నుంచి శాశ్వతంగా తీసేస్తామన్నారు. టెన్త్ పరీక్షల నిర్వహణపై కలెక్టర్లు, పోలీస్ కమిషనర్లు, ఎస్పీలతో మంగళవారం ఆమె వీడియో కాన్ఫరెన్స్ నిర్వహించారు.
ఈ సందర్భంగా మంత్రి మాట్లాడుతూ.. స్వార్థ ప్రయోజనాల కోసం విద్యార్థుల భవిష్యత్తో ఆడుకోవద్దన్నారు. మిగిలిన పరీక్షల విషయంలో కట్టుదిట్టమైన ఏర్పాట్లు చేయాలని కలెక్టర్లు, ఎస్పీలకు సూచించారు. పరీక్షల నిర్వహణలో 55 వేల మంది అధికారులు, సిబ్బంది పాల్గొంటున్నారన్నారు. ఎట్టి పరిస్థితుల్లోనూ సెల్ఫోన్లు, ఎలక్ట్రానిక్ పరికరాలను ఎగ్జామ్ సెంటర్లలోకి అనుమతించొద్దని సూచించారు. పరీక్ష పేపర్ల రవాణా విషయంలోనూ శ్రద్ధ తీసుకోవాలన్నారు. సెంటర్ల వద్ద 144 సెక్షన్ అమలు చేయడంతోపాటు జిరాక్స్ షాపులను మూసివేయించాలన్నారు. ఇంటర్ పరీక్షలను సజావుగా నిర్వహించిన అధికారులను అభినందించారు.
