హైదరాబాద్, వెలుగు: వచ్చే వానాకాలం సీజన్ కోసం 24.40 లక్షల టన్నుల ఫర్టిలైజర్స్ అవసరమని వ్యవసాయ శాఖ నిర్ణయించింది. ఇందులో ఒక్క యూరియానే 10.40 లక్షల టన్నులు అవసరం ఉందని అంచనా వేసింది. ఈ మేరకు వానాకాలం సీజన్ 2024 ఎరువుల ప్రణాళికను వ్యవసాయ శాఖ బుధవారం విడుదల చేసింది.
ఫర్టిలైజర్స్ ప్లాన్ను కేంద్రం ఆమోదించిందని, దాని ప్రకారం ఎరువుల కేటాయింపు జరుగుతుందని తెలిపింది. డీఏపీ 2.40 లక్షల టన్నులు, ఎన్పీకే 10 లక్షల టన్నులు, ఎంవోపీ 60వేల టన్నులు, ఎస్ఎస్పీ లక్ష టన్నులను రైతులకు అందుబాటులో ఉంచుతారు. గతేడాది బఫర్గా పెట్టుకున్న ఎరువులు కూడా మార్క్ఫెడ్ వద్ద రెడీగా ఉన్నాయని వ్యవసాయ శాఖ వెల్లడించింది.
ఏప్రిల్ నుంచి సెప్టెంబర్ వరకు ప్రతి నెలా ఎన్ని ఎరువులు అవసరం అవుతాయో ఆ మేరకు ప్లాన్కు రెడీ చేశారు. అత్యధికంగా మే, జూన్ నెలల్లో 4.60 లక్షల టన్నుల చొప్పున ఎరువులు రైతులకు అందుబాటులో ఉంచనున్నారు. ఈ రెండు నెలల్లో ఎరువుల అవసరం ఎక్కువ ఉండనుండగా, ఆ మేరకు 9.20 లక్షల టన్నులు కేటాయించారు. ఈ ఏడాది ఎరువుల కొరత ఉండదని, రైతులకు అన్ని రకాల ఎరువులు అందుబాటులో ఉంచుతామని వ్యవసాయ శాఖ అధికారులు తెలిపారు.
