- అదే నెల 10 నుంచి ఏప్రిల్1 వరకు దరఖాస్తుల స్వీకరణ
హైదరాబాద్, వెలుగు: రాష్ట్రంలో ఎల్ఎల్బీ, ఎల్ఎల్ఎం కోర్సుల్లో ప్రవేశాలకు నిర్వహించే టీజీ లాసెట్, పీజీఎల్ సెట్–2026 షెడ్యూల్ విడుదలైంది. మంగళవారం హైదరాబాద్లోని హయ్యర్ ఎడ్యుకేషన్ కౌన్సిల్ లో టీజీసీహెచ్ఈ చైర్మన్ ప్రొఫెసర్ బాలకిష్టారెడ్డి నేతృత్వంలో టీజీలాసెట్ సమావేశమైంది. ఈ సందర్భంగా ఆయా ప్రవేశపరీక్షల షెడ్యూల్ పై చర్చించి, ఫిబ్రవరి 8న నోటిఫికేషన్ రిలీజ్ చేశారు. ఫిబ్రవరి 10 నుంచి ఆన్లైన్లో అప్లికేషన్లు తీసుకుంటారు.
ఎటువంటి ఆలస్య రుసుము లేకుండా ఏప్రిల్ 1 వరకు దరఖాస్తు చేసుకోవచ్చు. లేట్ ఫీజుతో మే 13 వరకు అవకాశముంది. కాగా, మే 18న కంప్యూటర్ బేస్డ్ టెస్ట్ నిర్వహించనున్నారు. మూడేండ్ల ఎల్ఎల్బీ ప్రవేశాల కోసం ఉదయం 9.30 నుంచి 11 గంటల వరకు, మధ్యాహ్నం 12.30 నుంచి 2 గంటల వరకు రెండు సెషన్లు ఉంటాయి. ఐదేండ్ల ఎల్ఎల్బీ, ఎల్ఎల్ఎం కోర్సు కోసం సాయంత్రం 4 గంటల నుంచి 5.30 గంటల వరకు పరీక్ష ఉంటుంది. మరిన్ని వివరాలకు www.lawcet.tgche.ac.in వెబ్సైట్ను చూడాలని కన్వీనర్ విజయలక్ష్మి తెలిపారు. సమావేశంలో వైస్ చైర్మన్లు ఇటిక్యాల పురుషోత్తం, మహమూద్, సెక్రటరీ శ్రీరామ్ వెంకటేశ్, ఓయూ వీసీ కుమార్ తదితరులు పాల్గొన్నారు.
ఫిబ్రవరి 9 నుంచి ‘ఈసెట్’ దరఖాస్తులు
హైదరాబాద్, వెలుగు: పాలిటెక్నిక్ డిప్లొమా, బీఎస్సీ మ్యాథ్స్ పూర్తి చేసి బీటెక్, బీఫార్మసీలో లేటరల్ ఎంట్రీ సెకండ్ ఇయర్ లో అడ్మిషన్ల కోసం నిర్వహించే టీజీ ఈసెట్ 2026 షెడ్యూల్ రిలీజ్ అయింది. మంగళవారం టీజీసీహెచ్ఈ చైర్మన్ బాలకిష్టారెడ్డి అధ్యక్షతన ఈసెట్ సమావేశం జరిగింది. ఈ సందర్భంగా షెడ్యూల్ ఖరారు చేశారు.
ఫిబ్రవరి 5న నోటిఫికేషన్ రిలీజ్ చేయనున్నట్టు వెల్లడించారు. ఫిబ్రవరి 9 నుంచి ఏప్రిల్ 18 వరకూ దరఖాస్తు చేసుకోవచ్చని అధికారులు తెలిపారు. పరీక్ష రాసే ఎస్సీ, ఎస్టీ, పీహెచ్ అభ్యర్థులు రూ.500, ఇతర అభ్యర్థులు రూ.900 రిజిస్ట్రేషన్ ఫీజుగా చెల్లించాల్సి ఉంటుందన్నారు. మే 15న ప్రవేశపరీక్ష ఉంటుంది.
ఎంట్రెన్స్ ఎగ్జామ్స్ హాల్ టికెట్లపై క్యూఆర్ కోడ్
రాష్ట్రంలో నిర్వహించే అన్ని రకాల ప్రవేశ పరీక్షల హాల్ టికెట్లపై ఈసారి ‘క్యూఆర్ కోడ్’ ముద్రించనున్నారు. పరీక్షా కేంద్రం ఎక్కడుందో తెలియక విద్యార్థులు ఇబ్బంది పడకూడదనే ఉద్దేశంతో ఈ నిర్ణయం తీసుకున్నట్లు తెలంగాణ హయ్యర్ ఎడ్యుకేషన్ కౌన్సిల్ చైర్మన్ వి.బాలకిష్టారెడ్డి తెలిపారు. మంగళవారం మీడియాతో ఆయన మాట్లాడారు. గతేడాది టీజీ ఎప్ సెట్ రాసిన విద్యార్థుల హాల్ టికెట్లపై మాత్రమే క్యూఆర్ కోడ్ పెట్టామని గుర్తుచేశారు.
ఇది మంచి ఫలితాలను ఇవ్వడంతో.. ఈ సంవత్సరం నిర్వహించే లాసెట్, ఈసెట్, ఐసెట్, పీజీఈసెట్, ఎడ్ సెట్ సహా అన్ని ఎంట్రెన్స్ ఎగ్జామ్స్ కు దీనిని వర్తింపచేస్తున్నట్టు చెప్పారు. అభ్యర్థులకు సిటీల్లో పరీక్షా కేంద్రాలను వెతకడం ఇబ్బందిగా మారడంతో ఈ నిర్ణయం తీసుకున్నామని వివరించారు.
