- చెప్పింది రూ. 400 కోట్లు.. బడ్జెట్లో పెట్టింది 619 కోట్లు
- ఎలివేషన్ డిజైన్లలో జాప్యంతో మరింత పెరిగిన వ్యయం
- ఎంతైనా వెచ్చించేందుకు సిద్ధమంటున్న ప్రభుత్వం
హైదరాబాద్, వెలుగు: సెక్రటేరియెట్ నిర్మాణ ఖర్చు అంతకంతకూ పెరిగిపోతున్నది. అనుకున్న టైంలో నిర్మాణం పూర్తి చేయకపోవడంతో ఖర్చు తడిసిమోపెడవుతున్నది. ముందు వేసుకున్న అంచనాలు ఎప్పటికప్పుడు మారుతుండటం, ఎలివేషన్ డిజైన్లలో మార్పులు చేయడంతో కట్టడం పూర్తయ్యే నాటికి రూ. 1,200 కోట్లు వెచ్చించాల్సి వస్తుందని ఆఫీసర్లు అంటున్నారు. అయితే ఎంత ఎక్కువ ఖర్చయినా పర్లేదని నిర్మాణ సంస్థ షాపూర్జీ పల్లోంజీకి రాష్ట్ర సర్కార్ హామీ ఇచ్చినట్లు తెలిసింది. ఈ లెక్కలు అన్ని నిర్మాణం చివరి దశకు చేరుకున్నాక ఫైనల్ చేయనున్నట్లు ప్రభుత్వ ఉన్నతాధికారి ఒకరు చెప్పారు. కన్సల్టేషన్ చార్జీలు పెంచాలని కోరుతూ షాపూర్ జీ పల్లోంజీ రాష్ట్ర సర్కార్కు లేఖ రాసింది. గత నవంబర్లో పూర్తయిన సర్వీస్ పీరియడ్ను
ప్రభుత్వం ఇప్పటికే పొడిగించింది.
రూ. 400 కోట్ల నుంచి మొదలు..!
ఆరు ఫ్లోర్లు.. ఆరు లక్షల చదరపు అడుగుల్లో సెక్రటేరియెట్ నిర్మాణానికి రూ.400 కోట్లు అవుతుందని తొలుత లెక్కలు కట్టి బడ్జెట్ రిలీజ్ ఆర్డర్ ఇచ్చారు. ఆ తర్వాత టెండర్లప్పుడు అది కాస్తా రూ. 494 కోట్లకు చేరింది. షాపూర్జీ పల్లోంజీ 4 శాతం ఎక్కువగా రూ. 514 కోట్లు కోట్ చేసి టెండర్ ప్రక్రియలో ఎల్-1 గా నిలిచింది. కొద్ది రోజులకే ఈ అంచనాలను పెంచారు.
ఒక ఫ్లోర్ పెరిగిందని, ఇంకో లక్ష చదరపు అడుగులకు అంచనా వ్యయం రూ. 219 కోట్లు అవుతుందంటూ మొత్తం కాస్ట్ రూ.619 కోట్లకు చేర్చారు. ఈ మేరకు బడ్జెట్ కేటాయింపులు జరిగాయి. ఆ తర్వాత ధరలు పెరిగినందున నిర్మాణ ఖర్చు రూ.800 కోట్లు అవుతుందన్నారు. అది మళ్లీ రూ.వెయ్యి కోట్లకు చేరింది. ఇట్లా పనులు పూర్తయ్యే నాటికి ఖర్చు రూ.1,200 కోట్లు చేరుతుందని ఆఫీసర్లు చెప్తున్నారు. ఈ మేరకు ప్రపోజల్స్ రెడీ చేసినట్లు సమాచారం.
ఏడాదిలో పూర్తి చేస్తమన్నరు.. కానీ..!
సెక్రటేరియెట్ నిర్మాణం టెండర్లు 2020 అక్టోబర్లో షాపూర్జీ పల్లోంజీ సంస్థ దక్కించుకుంది. 12 నెలల్లోపు పనులు పూర్తి చేయాలని టెండర్లో ప్రభుత్వం స్పష్టం చేసింది. అయితే, కరోనాతో కూలీలు ఇంటికి వెళ్లడంతో పనులు కొంతకాలం నిలిచిపోయాయి. ఆ తర్వాత డిజైన్లు మార్పులు చేస్తూ వస్తున్నారు. రెడ్ స్టోన్ వంటివి తీసుకురావడం, సర్కార్ అప్పటికప్పుడు మార్పులు సూచిస్తుండటం, ఎలివేషన్, టైల్స్, హాల్స్, పిల్లర్స్ డిజైన్లు మార్చడంతో మరింత ఆలస్యం అవుతూ వస్తున్నది. ఈసారి దసరా లోపు సెక్రటేరియెట్ నిర్మాణం పూర్తి చేయాలని టార్గెట్గా పెట్టుకున్నారు.
ఇతర నిర్మాణాలపై దృష్టి లేదు
సెక్రటేరియెట్ నిర్మాణంపై ఉన్న ఆసక్తి ఇతర ప్రభుత్వ నిర్మాణలపై సర్కార్ పెట్టడం లేదన్న విమర్శలు వస్తున్నాయి. ఇప్పటికే డబుల్ బెడ్రూం ఇండ్ల విషయంలో అర్హుల నుంచి తీవ్ర అసంతృప్తి వ్యక్తమవుతున్నది. మరోవైపు సెక్రటేరియెట్కు 200 మీటర్ల దూరంలో నిర్మించ తలపెట్టిన 150 అడుగుల అంబేద్కర్ విగ్రహం, అమరవీరుల స్మారక స్థూపం–స్మృతి వనం పనులు అంతంత మాత్రంగానే సాగుతున్నాయి. సెక్రటేరియెట్కంటే ముందే వీటిని ప్రపోజ్ చేశారు. అయితే.. వీటిని పూర్తి చేసేందుకు ఇంకో ఏడాదైనా టైం పడుతుందని ఆఫీసర్లు చెప్తున్నారు. ఇప్పటివరకు సెక్రటేరియెట్ నిర్మాణ పనులను కేసీఆర్ స్వయంగా వచ్చి 5 సార్లు పరిశీలించారు. అదే అంబేద్కర్ విగ్రహం ఏర్పాటు చేసే ప్రాంతం, అమరవీరుల స్మారక స్తూపాన్ని విజిట్ చేయలేదని విమర్శలు ఉన్నాయి. ఇక 40 ఆత్మగౌరవ భవనాలకు భూములు కేటాయించడమే తప్ప వాటి నిర్మాణాలపై ఎలాంటి నిర్ణయం తీసుకోలేదు.