హైదరాబాద్, వెలుగు: రాష్ట్రంలో పని చేస్తున్న వీఆర్వోల వివరాలను వెంటనే పంపాలని అన్ని జిల్లాల కలెక్టర్లకు ప్రభుత్వం ఆదేశాలు జారీ చేసింది. ఇందుకోసం సీసీఎల్ఏ అధికారులు ప్రత్యేక ఫార్మాట్ ను పంపారు. అందులో వీఆర్వో పేరు, మండలం, సొంతూరు, ఎంప్లాయ్ ఐడీ నంబర్, ఫోన్ నంబర్, పుట్టిన తేదీ, ఉద్యోగంలో చేరిన తేదీ, అపాయింట్ మెంట్ అయిన విధానం (కంపాషనేట్/డైరెక్ట్ రిక్రూట్మెంట్), పాత ఉమ్మడి జిల్లా పేరు, గత మూడేళ్లలో పని చేసిన ప్రాంతాలు, ప్రస్తుతం ఉన్న మండలంలో చేరిన తేదీ, క్యాస్ట్, డిసేబులిటీ, సస్పెన్షన్/లీవ్/ అబ్స్కాండింగ్ వివరాలను పొందుపరిచారు. అలాగే సదరు వీఆర్వో పనితీరును అసెస్మెంట్ చేస్తూ తహసీల్దార్లు ఏ,బీ,సీ,డీ గ్రేడ్స్ ఇవ్వాలని ఓ కాలమ్ పెట్టారు. ఇంకా రిమార్క్స్ ఉన్నా చెప్పాలని ప్రత్యేకంగా కాలమ్ ఇచ్చారు. వీఆర్వోల పనితీరు ఆధారంగా శాఖలు కేటాయించేందుకే గ్రేడింగ్ అడిగారనే అనుమానాలు వ్యక్తమవుతున్నాయి. అయితే ప్రభుత్వం ఒకవేళ వీఆర్వోలను ఇతర శాఖల్లో జాయిన్ కావాలని ఆదేశాలు జారీ చేస్తే, ఏ ఒక్కరూ జాయిన్ కావొద్దని తెలంగాణ వీఆర్వోల సంఘం రాష్ట్ర అధ్యక్షుడు గోలకొండ సతీశ్ పిలుపునిచ్చారు.
