ఏండ్లు గడుస్తున్నా రైతుల కష్టాలు తీరడం లేదు

• రైతులకు అందని పట్టాదారు పాస్​బుక్​లు
• ధరణిలో కొంతమేరకే భూమి వివరాల డిస్ ప్లే
• 1,827 ఎకరాలకు నేటికీ అందని రైతుబంధు

మహబూబాబాద్/కేసముద్రం, వెలుగు: మహబూబాబాద్​ జిల్లా  కేసముద్రం మండలం నారాయణపురం గ్రామ రైతుల కష్టాలు ఏండ్లు గడుస్తున్నా తీరడం లేదు. నాయకులు, ఆఫీసర్లు సమస్యలను పరిష్కరిస్తామని పలుసార్లు హామీలు ఇచ్చినా రైతులకు మాత్రం పట్టా పాస్​బుక్​లు అందట్లేదు. గ్రామానికి చెందిన1,200 మంది రైతుల 1,827 ఎకరాలను ఆఫీసర్లు భూరికార్డుల ప్రక్షాళన సమయంలో రిజర్వ్ ఫారెస్ట్ కేటగిరిలో చేర్చారు. సీఎం కేసీఆర్ ఆదేశాలతో రైతులకు పట్టాదారు​పాస్ బుక్​లు ఇచ్చేందుకు 11 నెలల క్రితం ఎంజాయ్ మెంట్​సర్వే చేశారు. రైతులకు కొత్త పాస్​బుక్​లు మంజూరు చేస్తామని రెండు నెలల క్రితం మంత్రి సత్యవతి రాథోడ్​ హామీ ఇచ్చారు. రైతులు ధరణిలో అప్లై చేసుకుంటే పాస్​బుక్కులు ఇస్తామని చెప్పారు.

కానీ నేటికీ రైతులకు పాస్​బుక్​లు ఇవ్వలేదు. ధరణిలో పట్టాదారు పాసు పుస్తకాల డేటా కరెక్షన్ కోసం దరఖాస్తు చేసుకున్న 149, 150, 154, 165 , 166,168 సర్వే నంబర్లలోగల రైతులకు 1,403 ఎకరాలకు వెంటనే పాస్ బుక్​లు జారీ చేయాలని,  అటవీశాఖ 5 జనవరి 2022న క్లియరెన్స్ ఇచ్చిన సర్వే నంబర్లు 116, 117, 151, 152, 164, 167లోని 202 ఎకరాలకు ఎంజాయ్ మెంట్ సర్వే చేసి పాస్ బుక్​లు ఇవ్వాలని రైతులు కోరుతున్నారు. 165వ సర్వే నంబర్ లో 60 సంవత్సరాలు సాగులో ఉండి, పట్టాదారు పాస్​బుక్​ కలిగి ఉన్న 150 ఎకరాలకు గతంలో ఎంజాయ్​మెంట్ సర్వే చేసేటప్పుడు ఔట్ ఆఫ్ బౌండరీ అని వదిలిపెట్టారు. వాటికి సర్వే నంబర్లు గుర్తించి పాస్ బుక్​లు ఇవ్వాల్సి ఉంది.

త్వరలో పాస్​బుక్​లు ఇస్తాం

జిల్లాలోని కేసముద్రం మండలం నారాయణపురం గ్రామానికి చెందిన అర్హులైన రైతులకు పట్టాదారు పాసు పుస్తకాలు అందజేయడం కోసం ప్రయత్నాలు కొనసాగుతున్నాయి.  గ్రామంలో ఇప్పటికే  ఎంజాయ్ మెంట్ సర్వే నిర్వహించాం.  గత భూ రికార్డుల ఆధారంగా కొత్త పాస్​బుక్​లు అందజేస్తాం. ఇప్పటికే ధరణిలో భూమి వివరాలు డిస్ ప్లే అవుతున్నాయి. కొంతమంది రైతులు తమకు  సమస్యలను ఉన్నాయని చెబుతున్నారు. వాటిని వెరిఫై చేసి త్వరలో కొత్త పాస్​బుక్​లు అందిస్తాం.  – కొమురయ్య, ఆర్డీవో, మహబూబాబాద్​