చిన్నప్పుడు బొమ్మరిల్లు కట్టుకుని ఆడుకున్న తీపిగుర్తులు చాలామందికి ఉంటాయి. ఇల్లు ఒకటే కాదు.. అందులో కిచెన్ కట్టి, చిన్న పాత్రల్లో వంట చేస్తుంటారు పిల్లలు. అలాంటి బొమ్మరిల్లే కట్టి, చిన్న పాత్రల్లో రుచికరమైన ఫుడ్ వండుతుంది వలర్మతి. చికెన్ బర్గర్, పానీ పూరీ, హైదరాబాదీ దమ్ బిర్యానీ.. ఇలా ఎన్నో రకాల వంటలు చేస్తుంది. ఆ వీడియోలను ‘‘ది టైనీ ఫుడ్స్” యూట్యూబ్ ఛానెల్లో చూడొచ్చు.
ది టైనీ ఫుడ్స్.. ఇండియాలోనే మొట్టమొదటి మినియేచర్ కుకింగ్ ఛానెల్. దీన్ని రామ్ కుమార్, వలర్మతి దంపతులు నడుపుతున్నారు. వీళ్లది తమిళనాడులోని తిరువణ్ణామలైకి 30 కిలోమీటర్ల దూరంలో ఉన్న తానిపాడి అనే చిన్న గ్రామం. టైనీ ఫుడ్స్ ఛానెల్ను 2017 నవంబర్లో మొదలుపెట్టారు. ఏ పని చేసినా కొత్తగా చేయాలి అనే ఆలోచన నుంచే పుట్టింది ఈ ఛానెల్. కిచెన్లో వంటలు చేసి చూపించేవాళ్లు యూట్యూబ్లో చాలామందే ఉన్నారు. అందుకే కాస్త ఢిఫరెంట్గా మినియేచర్ సెటప్లో మైక్రో కుకింగ్ చేస్తున్నారు వలర్మతి.
ఫర్ఫెక్షన్..
ఈ ఛానెల్లో అప్లోడ్ చేసే ప్రతి వీడియో చాలా ఫర్ఫెక్షన్తో తీస్తారు. మినియేచర్ కుకింగ్ చేయడమే కాదు.. అందుకు తగ్గట్టుగా ఒక చిన్న ఇంటిని, ఇంటి ముందు పశువులు, కిచెన్ సెటప్, పాత్రలు, వస్తువులు ఏర్పాటు చేస్తారు. ఆ వీడియోలు చూస్తుంటే.. లిల్లీపుట్ వరల్డ్ కళ్లముందు ఉన్నట్టు అనిపిస్తుంది. వీడియోల కోసం అవుట్ డోర్ సెట్టింగ్, బ్యూకోలిక్(అందమైన, సంప్రదాయ) విలేజ్ని ఏర్పాటు చేశారు. రామ్ కుమార్ కార్డ్ బోర్డ్, ఎండుగడ్డి కర్రలతో చిన్న గుడిసెలను తయారు చేస్తాడు. వాటికి ఒక సాధారణ ఇండియన్ విలేజ్ హోమ్ లుక్ వచ్చేందుకు తడి ఇసుక పూస్తాడు. బ్యాక్ డ్రాప్లో కూడా కొన్ని చిన్న వస్తువులు ఉంటాయి. బుల్లి ఆవులు, కోళ్లు, మేకలు, ఎడ్ల బండి, నీటి పంపు, బావి లాంటి బొమ్మలు పెడుతుంటారు.
కుకింగ్ ఛానెల్ పెట్టాలని..
ఊళ్లోనే వ్యవసాయం చేస్తుంటాడు రామ్ కుమార్. వలర్మతి గవర్నమెంట్ ఉద్యోగి. వలార్ వంట బాగా చేస్తుంది. అందుకే రామ్ యూట్యూబ్ ఛానెల్ పెట్టి తన భార్య వంటలను వీడియోలు తీసి అప్లోడ్ చేయాలి అనుకున్నాడు. ముందుగా కుకింగ్ ఛానెల్స్ గురించి తెలుసుకోవాలని ఇంటర్నెట్లో వెతికాడు. అప్పుడే జపనీస్ మినియేచర్ కుకింగ్ వీడియోల గురించి తెలిసింది. దాంతో అలాంటి వీడియోలు చేయాలని నిర్ణయించుకున్నాడు. వెంటనే ఛానెల్ పెట్టారు. ఈ ఛానెల్లో ముఖ్యంగా దక్షిణ భారత వంటకాలే ఎక్కువ చేశారు. తక్కువ క్వాంటిటీ చేసినా వంట చాలా ఫర్ఫెక్ట్గా ఉంటుంది. చిన్న పొయ్యి మీద వండడమంటే మామూలు విషయం కాదు. అందుకోసం చాలా టేకులు తీసుకోవాల్సి వస్తుంది. పైగా వంటకు కావాల్సినవన్నీ ఆమే స్వయంగా తయారుచేసుకుంటుంది. వేగించడం, రుబ్బడం, ఉడకబెట్టడం, ఆవిరి పట్టడం లాంటి పనులు కూడా వలార్ చాలా పర్ఫెక్ట్గా చేస్తుంది. ఛానెల్లో ఇప్పటివరకు ఎన్నో రకాల స్నాక్స్, బర్గర్లు, పిజ్జాలు, నూడుల్స్, చేపలు, చికెన్, మటన్, మిల్క్ షేక్ లాంటివి చేశారు. ఇవి చేసేటప్పుడు ఎక్కడా మోడర్న్ కిచెన్లో ఉండే అప్లయెన్స్లు వాడదు ఆమె. అన్నీ సంప్రదాయ వంటగదిలో ఉండే వస్తువులనే వాడుతుంది.
మరో ప్రయోగం..
ది టైనీ ఫుడ్స్ సక్సెస్ ఇచ్చిన ఉత్సాహంతో మరో ప్రయోగం చేశారు ఈ జంట. ‘‘ది ట్రెడిషనల్ లైఫ్” పేరుతో మరో ఛానెల్ పెట్టారు. ఇందులో తమిళ నేటివిటీని చూపిస్తున్నారు. ఒక చిన్న పూరి గుడిసెలో తమిళ కల్చర్, సంప్రదాయాలు పాటించే భార్యాభర్తలు(వలార్-– రామ్) ఉంటారు. వాళ్లు రోజూ చేసే పనులనే వీడియోలు తీసి ఈ ఛానెల్లో అప్లోడ్ చేస్తున్నారు. భర్త పొలం పనులు చేస్తుంటాడు. భార్య ఇంటి పనులు, వంట చేస్తుంటుంది. ఈ ఛానెల్లో కూడా వంట మీదే ఎక్కువ ఫోకస్ చేశారు. వీడియోల కోసం పొలాల మధ్యలో ప్రత్యేకంగా ఒక చిన్న గుడిసె కూడా ఏర్పాటు చేసుకున్నారు. ఆ గుడిసెలో అన్ని వస్తువులు తమిళ వాతావరణాన్ని చూపించేవే. ఈ ఛానెల్లో వీడియోలకు కూడా మిలియన్లలో వ్యూస్ వస్తున్నాయి. ది టైనీ ఫుడ్స్ ఛానెల్కు 30.69 లక్షలు, ది ట్రెడిషనల్ లైఫ్ ఛానెల్కు సుమారు 9.95 లక్షల మంది సబ్స్క్రయిబర్స్ ఉన్నారు.
ప్రపంచవ్యాప్తంగా వాస్తవానికి మినియేచర్ వీడియోలను పోస్ట్ చేయడం మొదట జపాన్లో మొదలైంది. ఇప్పుడు చాలా దేశాల్లో ఇలాంటి ఛానెళ్లు ఉన్నాయి. మినియేచర్ స్పేస్ లాంటి జపనీస్ ఛానెళ్లలో మినియేచర్ ఫ్రిజ్, ఒవెన్, స్టవ్, వాష్బేసిన్ లాంటివాటిని తయారుచేసి, వాడుతున్నారు. వాటిని మార్కెట్లో కూడా అమ్ముతున్నారు. బ్రిటన్, ఫిలిప్పీన్స్, అమెరికా, టర్కీలో ఇలాంటి ఛానెళ్లు ఫేమస్.
