కోహెడ/బెజ్జంకి, వెలుగు: నెలలు నిండిన గర్భిణి డెలివరీ కోసం వెళ్తే కరోనా పేరుతో మూడు హాస్పిటళ్లు తిప్పారు. దాంతో ఆమె కడుపులోని కవలలిద్దరూ మృతి చెందారు. సిద్దిపేట జిల్లా బెజ్జంకి మండలం బేగంపేటకు చెందిన రామస్వామి, కమల భార్యాభర్తలు. కమలను డెలివరీ కోసం ఈ నెల 17న కరీంనగర్ గవర్నమెంట్హాస్పిటల్కు తీసుకెళ్లారు. కరోనా కేసులు ఎక్కువగా ఉన్నాయని, తమ జిల్లా పరిధి కాదని అక్కడి డాక్టర్లు సిద్దిపేటకు వెళ్లాలన్నారు. దాంతో 18న సిద్దిపేట హాస్పిటల్కు వెళ్లారు. అక్కడ కేవలం కరోనా కేసులను మాత్రమే చూస్తున్నామని, గజ్వేల్ హాస్పిటల్లో డెలివరీలు చేస్తున్నారని, అక్కడికే వెళ్లాలని డాక్టర్లు సూచించారు. వెంటనే అక్కడి నుంచి గజ్వేల్ వెళ్లగా, డాక్టర్లు హాస్పిటల్లో అడ్మిట్ చేసుకోకుండా హైదరాబాద్ నిలోఫర్ కు రెఫర్ చేశారు. హైదరాబాద్ దూరవుమతుందనే ఉద్దేశంతో తిరిగి ఇంటికి వెళ్లిపోయారు. ఈ నెల 20న నొప్పులు ఎక్కువ కావడంతో మళ్లీ కరీంనగర్ గవర్నమెంట్ హాస్పిటల్కు తీసుకెళ్లారు. అక్కడి డాక్టర్లను వేడుకోగా సర్జరీ చేయడానికి ఒప్పుకున్నారు. మొదట స్కానింగ్ తీయగా, కడుపులో ఉన్న కవలల్లో ఆడ బిడ్డ చనిపోయినట్లు గుర్తించారు. సర్జరీ చేయగా మగ బిడ్డ పరిస్థితి విషమంగా ఉండడంతో మెరుగైన వైద్యం కోసం చైల్డ్ కేర్ స్పెషల్ వార్డుకు తరలించారు. ట్రీట్మెంట్ పొందుతూ శనివారం ఆ బిడ్డ కూడా చనిపోయింది. డాక్టర్ల నిర్లక్ష్యం వల్లే కవల పిల్లలను కోల్పోయామంటూ కుటుంబసభ్యులు ఆవేదన వ్యక్తం చేశారు.