మొదటి నుంచీ… అయోధ్యలో ఎప్పటికైనా రామమందిరం కడతామన్న ధీమా విశ్వహిందూ పరిషత్ (విహెచ్పీ)లో బలంగా ఉంది. దీనికోసం అయోధ్యలోని కరసేవక్ పురంలో ఒక పెద్ద వర్క్షాపు ఏర్పాటు చేసుకుంది. రామ మందిరానికి గీసిన ప్లాన్ ప్రకారం… 268 అడుగుల పొడవు, 140 అడుగుల వెడల్పు, 128 అడుగుల ఎత్తులో ఆలయం తయారవుతుంది. రెండంతస్తులుగా నిర్మించే ఈ ఆలయంలో ఫ్లోర్కి 106 చొప్పున మొత్తం 212 స్తంభాలుంటాయి. ప్రతి స్తంభం పైనా 16 విగ్రహాలను చెక్కుతారు. ఇప్పటికే 65 శాతం పని పూర్తయ్యిందని, మొదటి అంతస్తుకి అంతా రెడీగా ఉందని విహెచ్పీ అధికార ప్రతినిధి శరత్ శర్మ చెబుతున్నారు. ఈ వర్క్షాపులో అమావాస్య నాడు మినహా మిగతా అన్ని రోజుల్లోనూ శిల్పులు ఉదయం 7 నుంచి సాయంత్రం 5 గంటల వరకు పనిచేస్తూనే ఉంటారు. శిలలను ప్రి–ఫ్యాబ్రికేటెడ్ పద్ధతిలో నెంబర్లు వేసి చెక్కుతున్నారు. వాటిని నిర్మాణ స్థలంలో జిగ్సా పజిల్ తరహాలో ఒకదానిలో ఒకటి చొప్పిస్తారు. రాజస్థాన్లోని బన్సీ పహరాపూర్ నుంచి, ఆగ్రా నుంచి పింక్ పాలరాయిని తెప్పించారు. అయోధ్యతోపాటు పిండ్వారాలోకూడా ఒక వర్క్షాపుని నిర్వహిస్తున్నారు. అయోధ్యకు వచ్చే భక్తులు తప్పకుండా ఈ వర్క్షాపుని కూడా చూసి వెళ్తున్నారని శర్మ చెబుతున్నారు.
.
