దుబాయ్‌లో ప్రపంచంలోనే మొదటి ఎయిర్ ట్యాక్సీ స్టేషన్ సిద్ధం: త్వరలోనే నిజం కాబోతున్న గాలిలో ప్రయాణం 

దుబాయ్: ప్రపంచ ప్రముఖ పర్యాటక నగరం దుబాయ్‎లో రవాణా సేవలు మరింత సులభతరం కానున్నాయి. నిత్యం పర్యాటకుల సందడితో రద్దీగా ఉండే నగరంలో ట్రాఫిక్‎ సమస్యకు చెక్‎ పెట్టేందుకు ప్రభుత్వం ప్రారంభించిన ఎయిర్ టాక్సీ సేవలు అతి త్వరలోనే ప్రారంభం కానున్నాయి. ఇందు కోసం తొలి ఎయిర్ టాక్సీ స్టేషన్‎ నిర్మాణాన్ని దుబాయ్ ప్రభుత్వం పూర్తి చేసింది. దుబాయ్ ఇంటర్నేషనల్ ఎయిర్‎పోర్టు సమీపంలో ప్రపంచంలోనే మొట్టమొదటి పూర్తిస్థాయి ఎయిర్ టాక్సీ వెర్టిపోర్ట్ (టేకాఫ్ మరియు ల్యాండింగ్ స్టేషన్) స్టేషన్ అందుబాటులోకి తీసుకొచ్చింది. ఈ ఏడాది చివరి నుంచి ఎయిర్ ట్యాక్సీ సేవలు ప్రజలకు అందుబాటులోకి రానున్నట్లు తెలుస్తోంది. తద్వారా వాణిజ్యపరమైన ఎయిర్ టాక్సీ సేవలను అందించే ప్రపంచంలోని తొలి నగరంగా దుబాయ్ రికార్డు సృష్టించనుంది. 

ఎయిర్ ట్యాక్సీ స్టేషన్ ప్రత్యేకలు:

ఎయిర్ ట్యాక్సీ సేవల కోసం దుబాయ్ ప్రభుత్వం మొత్తం నాలుగు స్టేషన్లు నిర్మించాలని ప్రణాళికలు రచించింది. ఇందులో భాగంగా తొలి స్టేషన్‎ను దుబాయ్ ఇంటర్నేషనల్ ఎయిర్ పోర్టు సమీపంలో నిర్మించింది. దుబాయ్ రోడ్లు, రవాణా అథారిటీ (RTA) ప్రకారం.. ఈ స్టేషన్‌లో 3,100 చదరపు మీటర్ల విస్తీర్ణంలో నాలుగు అంతస్తుల భవనం, రెండు టేకాఫ్, ల్యాండింగ్ ప్యాడ్‌లు, రెండు స్థాయిల పార్కింగ్, ఎలక్ట్రిక్ విమానాల కోసం ఛార్జింగ్ స్టేషన్లు, ఏసీ సౌకర్యం గల ప్రయాణీకుల ప్రాంతాలు ఉన్నాయి. ఈ స్టేషన్ నుంచి ప్రతి సంవత్సరం సుమారు 1,70,000 మంది ప్రయాణీకులు రాకపోకలు సాగించనున్నారు.   

అమెరికాకు చెందిన జోబీ ఏవియేషన్ భాగస్వామ్యంతో దుబాయ్ ప్రభుత్వం ఈ ప్లయింగ్ ట్యాక్సీ సేవలను నిర్వహించనుంది. రోడ్డు మార్గంలో సుమారు 45 నిమిషాలు పట్టే ప్రయాణాన్ని ఈ ఎయిర్ టాక్సీ ద్వారా కేవలం 10 నుండి 12 నిమిషాల్లోనే పూర్తి చేయవచ్చు. తొలి దశలో భాగంగా దుబాయ్ విమానాశ్రయం, పామ్ జుమేరా, దుబాయ్ మెరీనా, డౌన్‌టౌన్ వంటి ప్రముఖ ప్రాంతాల్లో ఈ ఎయిర్ ట్యాక్సీలు తిరగనున్నాయి. 

తొలి ఎయిర్ ట్యాక్సీ స్టేషన్ నిర్మాణం పూర్తి కావడంపై దుబాయ్ యువరాజు షేక్ హమ్దాన్ బిన్ మహమ్మద్ బిన్ రషీద్ అల్ మక్తూమ్ సంతోషం వ్యక్తం చేశారు. ఎయిర్ ట్యాక్సీ స్టేషన్‎ను స్వయంగా ఆయన సందర్శించి పనుల పురోగతిని పరిశీలించారు. ఎయిర్ ట్యాక్సీ సేవలు ప్రారంభించేందుకు ఈ స్టేషన్ సిద్ధంగా ఉందన్నారు. ఇది కేవలం ఆరంభం మాత్రమేనని త్వరలో మరికొన్ని ప్లయింగ్ ట్యాక్సీ స్టేషన్లు అందుబాటులోకి తీసుకొస్తామన్నారు. తొలి దశలో నిర్మించిన ఎయిర్ ట్యాక్సీ స్టేషన్ డౌన్‌టౌన్, పామ్ జుమేరా, దుబాయ్ మెరీనా ప్రాంతాల్లో రాకపోకలు సాగిస్తుందని తెలిపారు. ఈ ఏడాది చివరి నాటికి ఎయిర్ ట్యాక్సీ సేవలు ప్రజలకు అందుబాటులోకి రానున్నాయన్నారు.