మహబూబ్నగర్, వెలుగు: హలో బ్రదర్ సినిమా చూశారా! చూస్తే.. ఆ సినిమాలో హీరో దొంగ, తన స్నేహితుడు దొంగతో కలిసి స్టేషన్ నుంచి తప్పించుకుని పోలీస్ జీపును ఎత్తుకెళ్లిపోయే సీన్ గుర్తుందా! అచ్చం అలాంటి సీనే జరిగింది జోగులాంబ గద్వాల జిల్లాలో. ఉండవల్లి మండలంలో ఐదు రోజుల కింద దొంగతనం చేస్తున్న ఓ వ్యక్తిని ఊరోళ్లు పోలీసులకు పట్టించారు. నాలుగు రోజులు స్టేషన్లో పెట్టి పోలీసులు విచారించారు. అతడు కార్లను చోరీ చేసే తీరును చెబుతుంటే పోలీసులే విస్తుపోయారట. నాలుగు రోజులు ఆ దొంగ బాగానే ఉన్నాడు. కానీ, బుర్రలో చోరీ అనే పురుగు తిరిగిందో ఏమోగానీ, గురువారం తెల్లవారుజామున స్టేషన్ నుంచి తప్పించుకున్నాడు. పొయ్యేటోడు ఉత్తగా పోయిండా..? ఏకంగా పోలీస్ ఇన్నోవా కారులో పరారయ్యాడు.
తెల్లారక దొంగ, కారు కనపడకపోయే సరికి షాక్ అవ్వడం పోలీసుల వంతైంది. గుట్టుచప్పుడు కాకుండా దొంగను పట్టుకునేందుకు పోలీసులు హడావుడిగా వెళ్లారు. హైవే వెంట వెతికారు. కొన్ని చోట్ల సీసీటీవీ ఫుటేజీలను పరిశీలించారు. అయినా దొంగ ఆచూకీ దొరకలేదు. ఇంతలోనే ఉండవెల్లి మండలంలోని తక్కశిల అనే గ్రామంలో పోలీస్ కారు కనిపించినట్టు వారికి కబురు వచ్చింది. వెంటనే అక్కడకు చేరుకుని అతడిని పట్టుకుని పోలీస్స్టేషన్కు తీసుకెళ్లారు. అప్పటికే ఈ విషయాన్ని కొందరు పోలీసులు ఉన్నతాధికారుల దృష్టికి తీసుకుపోవడంతో, ఆనోటా ఈ నోటా పడి అందరికీ తెలిసిపోయింది. ఈ విషయం పేపర్లలో రావొద్దని ఓ ఉన్నతాధికారి ఒత్తిడి తెచ్చినట్టు తెలుస్తోంది.
అయితే, చోరీ జరిగిన ముందు రోజు రాత్రి స్టేషన్లో నలుగురు సిబ్బంది ఉన్నట్టు చెబుతున్నారు. వాళ్లంతా కూడా మద్యం మత్తులో ఉన్నారన్న ఆరోపణలు వినిపిస్తున్నాయి. ఆ విషయాన్ని గమనించే దొంగ పారిపోయి ఉంటాడని కొందరు పోలీసులు చర్చించుకుంటున్నారు. డ్యూటీలో ఉన్న నలుగురు సిబ్బందితో పాటు ఎస్సైపైనా క్రమశిక్షణ చర్యలు తీసుకుంటార్న వార్తలు వినిపిస్తున్నాయి. అయితే, అసలు ఏ దొంగా దొరకలేదని, కారుతో పారిపోలేదని గద్వాల డీఎస్పీ షాకీర్ హుస్సేన్ చెప్పారు. పోలీస్ కారు పోయిందన్న వార్తలను నమ్మొద్దన్నారు. ఆ దొంగది తెలకపల్లి మండలం గట్టునెల్లికుదురు గ్రామంగా తెలుస్తోంది. హైదరాబాద్ ఎర్రమంజిల్లో మెకానిక్గా పనిచేస్తూ కార్ల దొంగతనాలకు అలవాటు పడ్డాడని అంటున్నారు.
