ఆమె స్కూల్, కాలేజీల్లో ఎప్పుడూ టాపరే.. కానీ,పెళ్లి తర్వాత కుటుంబ బాధ్యతల్లో పడి ఏం చదువుకుందన్న ఊసే మర్చిపోయింది. ఫ్యామిలీతో హ్యాపీగానే ఉంది. కానీ, ఏదో తెలియని వెలితి. ఇంత చదువుకుంది ఇంట్లో ఖాళీగా కూర్చోడానికా? అన్న ప్రశ్న మొదలైంది. ఇది మన దేశంలో కొన్ని లక్షలమంది హౌస్వైవ్స్ రోజూ జవాబు వెతికే ప్రశ్నే. మరి దీనికి పరిష్కారమేంటి? అన్న ఆలోచన నుంచి పుట్టిందే ‘హునార్ ఆన్లైన్ కోర్సెస్’. హౌస్వైవ్స్ కి ఉపాధి కల్పించడమే లక్ష్యంగా ఈ యాప్ని లాంచ్ చేసింది హైదరాబాద్కి చెందిన నిష్ట యోగేశ్. ఈ యాప్ ద్వారా 30 కి పైగా ఆన్లైన్ కోర్సుల్లో హౌస్ వైవ్స్ ని ట్రైన్ చేసి, వాళ్లకో దారి చూపిస్తోంది ఈమె.
విదేశాల్లో చదువుకుంది. తెలివితేటలకీ కొదవ లేదు. ప్రయత్నిస్తే మల్టీనేషనల్ కంపెనీలో ఉద్యోగం గ్యారెంటీ. లేదంటే సొంతగా కమర్షియల్ బిజినెస్ మొదలుపెట్టేది. కానీ, రొటీన్ బిజినెస్ ఫార్ములాస్కి కాస్త భిన్నంగా ఏదైనా చేయాలనుకుంది నిష్ట. తన పని పదిమంది ఆడవాళ్లకు ఉపాధి కల్పించేదై ఉండాలనుకుంది. మరీ ముఖ్యంగా హౌస్ వైవ్స్ కి ఒక ఐడెంటిటీ ఇవ్వాలనేది ఆమె ఆలోచన. ఆ ఆలోచనలకు రూపంగానే హునార్ ఆన్లైన్ కోర్సెస్ అనే యాప్ని లాంచ్ చేసింది.
బిజినెస్ నా డ్రీమ్
మా అమ్మానాన్నలిద్దరూ సక్సెస్ఫుల్ బిజినెస్ పర్సన్స్. చిన్నప్పట్నుంచి వాళ్లని చూస్తూ పెరగడం వల్ల బిజినెస్ ఓ ప్యాషన్గా మారింది నాకు. ఐదేళ్ల వయసు నుంచి బిజినెస్ విమెన్గా ఎదగాలని కలలు కన్నా. ఆ కలల్ని నిజం చేసుకోవడానికి స్కూల్ డేస్ నుంచే మా పేరెంట్స్ బిజినెస్లో ఇన్వాల్వ్ అయ్యేదాన్ని. ప్రొడక్షన్, మార్కెటింగ్ గురించి ప్రాక్టికల్గా నేర్చుకునేదాన్ని. చదువుని కూడా నా ఆసక్తికి అనుగుణంగానే ఎంచుకున్నా.. ఫైనాన్స్లో గ్రిప్ సాధించడానికి సి.ఎ. చదివా. ఆ తర్వాత బోస్టన్లో ఎంబిఏ జాయిన్ అయ్యా. ఆ టైంలోనే హౌస్ వైవ్స్ కోసం ఈ కోర్సుల ఐడియా తట్టింది. అప్పట్నుంచే కోర్సుల డిజైనింగ్ మొదలుపెట్టా. చదువు పూర్తయ్యాక ఇక్కడికొచ్చి ఎక్స్పీరియెన్స్ కోసం మా ఫ్యామిలీ బిజినెస్ ‘హ్యామ్స్టెక్’లో పనిచేశా. హ్యామ్స్టెక్లో ఆన్లైన్ కోర్స్లు కూడా ఉండేవి. ఆ కోర్సులను హౌస్వైవ్స్ కు మరింత అందుబాటులోకి తెచ్చేందుకు హునార్ ఆన్లైన్ కోర్సుల యాప్ని రెండేళ్ల క్రితం స్టార్ట్ చేశా.
ఈ కాన్సెప్టే ఎందుకంటే..
మన దేశంలో దాదాపు 20 కోట్లమంది హౌస్వైవ్స్ కి డిగ్రీ పట్టాలున్నాయి. కానీ, వాళ్లలో పద్నాలుగు కోట్లమంది ఆడవాళ్లు ఉద్యోగం చేయట్లేదు. కుటుంబ బాధ్యతలు, ఫ్యామిలీ ఒత్తిడి, పిల్లల బాగోగులు ఇలా కారణమేదైతేనేం వంటగదికే పరిమతమవుతున్నారు. మామూలుగా గర్ల్ చైల్డ్ని, పేద, మధ్య తరగతి మహిళల్ని ఎడ్యుకేట్ చేయడానికి, వాళ్లకి అవేర్నెస్ కల్పించడానికి చాలామంది చొరవ తీసుకుంటున్నారు. ప్రభుత్వాలు కూడా స్పెషల్ స్కీమ్స్ పెట్టి వాళ్లని ఎంకరేజ్ చేస్తున్నాయి. కానీ, హౌస్వైవ్స్ కి మాత్రం అలాంటి సపోర్ట్ ఒక్కటీ కనిపించట్లేదు. విమెన్ ఎంపవర్మెంట్ పెరగాలంటే ముందు కాన్సన్ట్రేట్ చేయాల్సిందే హౌస్వైవ్స్ పైనే. అందుకే ఇల్లాల్ల కోసం ఈ కాన్సెప్ట్ని తీసుకొచ్చా. హౌస్ వైవ్స్ లైఫ్ ఎంత బిజీగా ఉంటుందో అందరికీ తెలిసిందే. అందుకే వాళ్లు ఇంటినుంచే తమకి నచ్చిన కోర్సుని ఖాళీ టైం దొరికినప్పుడు నేర్చుకునేందుకు ఆన్లైన్ కాన్సెప్ట్ ఎంచుకున్నా.
ముప్పైకి పైగా కోర్సులు
గూగుల్ ప్లే స్టోర్లో ‘హునార్ ఆన్లైన్ కోర్సెస్’ యాప్ని డౌన్లోడ్ చేసుకుంటే ముప్పైకి పైగా కోర్సులకి సంబంధించిన వీడియోలు చూడొచ్చు. జువెలరీ మేకింగ్, ఫ్యాషన్ డిజైనింగ్, ఎంబ్రాయిడరీ, ఫ్యాబ్రిక్ డిజైనింగ్, బ్యాగ్ తయారీ, హోం డెకర్కి సంబంధించిన వీడియోలు వేలల్లో కనిపిస్తాయి. ఈ యాప్ డౌన్లోడ్ చేసుకున్నాక నచ్చిన సబ్జెక్ట్ ఎంచుకుని నేర్చుకోవడం మొదలు పెట్టొచ్చు. ప్రతి రెండు మూడు వీడియో చాప్టర్స్ తర్వాత ఓ అసైన్మెంట్ సబ్మిట్ చేయాలి. కోర్సంతా పూర్తయ్యేవరకు అంటే ఐదారు నెలల పాటు ఈ ప్రాసెస్ కంటిన్యూ అవుతుంది. అన్నీ అసైన్మెంట్స్లో బెస్ట్గా పెర్ఫార్మ్ చేసినవాళ్లందరికీ నేషనల్ స్కిల్ డెవలప్మెంట్ కార్పొరేషన్ నుంచి సర్టిఫికెట్ ఇస్తాం.
కాల్ చేయొచ్చు..
లెర్నింగ్ ప్రాసెస్లో ఏ మాత్రం డౌట్ వచ్చినా హౌస్వైవ్స్ మా వాట్సాప్ నెంబర్కి వీడియో కాల్ చేయొచ్చు. డౌట్స్ క్లారిఫికేషన్ కోసం మా టీమ్లో 110 మంది ఎక్స్పర్ట్స్ అందుబాటులో ఉంటారు. 2018 లో లాంచ్ అయిన హునార్ ఆన్లైన్ కోర్సెస్ యాప్కి ఇప్పటివరకు 5.5 లక్షల డౌన్లోడ్స్ వచ్చాయి.. మా యాప్ ద్వారా ఈ రెండేళ్లలో దేశవ్యాప్తంగా 6,500 మంది హౌస్ వైవ్స్ క్రియేటివ్ స్కిల్స్ నేర్చుకున్నారు. మా దగ్గర నేర్చుకుని సొంతంగా బిజినెస్ స్టార్ట్ చేసినవాళ్లు కూడా ఉన్నారు. ప్రస్తుతానికి తెలుగు, హిందీ, ఇంగ్లీష్ భాషల్లో మా కోర్సులు అందుబాటులో ఉన్నాయి. కోర్సుకి 8,000 రూపాయల్ని ఛార్జ్ చేస్తున్నాం. ఆ అమౌంట్ని కూడా ఒకేసారి కాకుండా ఇన్స్టాల్మెంట్లో కోర్సు పూర్తయ్యే లోపు కట్టుకోవచ్చు. కొన్ని ఫ్రీ కోర్సులు కూడా మా యాప్లో అందుబాటులో ఉన్నాయి.
ఆ ఆలోచనలో ఉన్నా
హునార్లో క్లాసెస్ వినాలంటే స్మార్ట్ ఫోన్ కంపల్సరీ.. అలాగే ఇంటర్నెట్ సదుపాయం కూడా అందుబాటులో ఉండాలి.ఈ రెండింటిని కొందరు ఎఫర్ట్ చేయలేకపోవచ్చు. మరీ ముఖ్యంగా పల్లెటూళ్లకి మా యాప్ని తీసుకెళ్లడం కష్టమవుతుంది. అందుకే ఇంటర్నెట్ అందుబాటులో లేని ప్రతి ఊళ్లో ఫ్రీగా ఓ ఇంటర్నెట్ సెంటర్ పెట్టే ఆలోచనలో ఉన్నా. అది చేయగలిగితే ప్రతి హౌస్వైవ్ హునార్ ఆన్ లైన్ కోర్సులని చేరుకోగలుగుతుంది. అలాగే భవిష్యత్తుల్లో మరిన్ని కోర్సుల్ని యాప్లో అందుబాటులో ఉంచే ఆలోచనలో ఉన్నా.
కన్విన్సింగ్ కష్టమైంది
ఆన్లైన్ ద్వారా క్రియేటివ్ కోర్సులంటే మొదట్లో అందరూ ఆశ్చర్యపోయారు. ఇది సాధ్యం కాదని చాలామంది చేరలేదు. దాంతో జనాల్ని కన్విన్స్ చేయడం చాలా కష్టమైంది మాకు. యాప్లో వాళ్లేం చెప్తారో.. మనకేం అర్థమవుతుందోననే అనుమానాల్ని దూరం చేయడానికి చాలా కష్ట పడ్డాం. ఆ కష్టమే ఈ రోజు లక్షల డౌన్లోడ్స్ అయ్యేలా చేసింది. ప్రస్తుతం కేవలం హౌస్ వైవ్సే కాదు ఏజ్ గ్రూప్తో సంబంధం లేకుండా అందరూ మా ఆన్లైన్ క్లాసెస్కి అటెండ్ అవుతున్నారు. వాళ్లలో స్టూడెంట్తో పాటు డాక్టర్స్, టీచర్స్ లాంటి ప్రొఫెషన్స్లో గుర్తింపు పొందినవాళ్లు కూడా ఉన్నారు. -ఆవుల యమున