మిచిగాన్: అమెరికాలోని మిషిగాన్ హైస్కూల్లో ఓ పదిహేనేండ్ల స్టూడెంట్ తోటి విద్యార్థులపై కాల్పులు జరిపాడు. దీంతో ముగ్గురు స్టూడెంట్లు అక్కడికక్కడే చనిపోగా.. మరో 8 మందికి బులెట్ గాయాలయ్యాయి. డెట్రాయిట్ ఏరియాలోని ఆక్స్ఫర్డ్ టౌన్షిప్ స్కూల్లో బుధవారం ఈ ఘటన జరిగిందని ఓక్లాండ్ కౌంటీ షరీఫ్ మైఖేల్ బోచార్డ్ మీడియాకు వెల్లడించారు. కాల్పులు జరిపిన స్టూడెంట్ ఆరోజు స్కూల్కు రాలేదని, తన తండ్రి కొద్దిరోజుల కిందే కొన్న సెమీ ఆటోమేటెడ్ పిస్టల్తో మధ్యాహ్నం స్కూల్లోకి వెళ్లాడని అధికారులు తెలిపారు. ‘‘ఆ సమయంలో స్కూల్లో మొత్తం 1700 మంది పిల్లలున్నారు. నిందితుడు గన్తో 20 రౌండ్లదాకా ఇష్టమొచ్చినట్లు కాల్పులు జరిపి ముగ్గురిని చంపేశాడు. ఫైరింగ్ మొదలైన 5 నిమిషాల్లోనే పోలీసులు స్కూల్ను చుట్టుముట్టి, నిందితుడిని అరెస్ట్ చేశారు”అని అధికారులు తెలిపారు.
పిస్టల్తో పాటు ఏడు రౌండ్ల బులెట్లు స్వాధీనం చేసుకుని నిందితుడిని జువైనల్ డిటెన్షన్ సెంటర్లో ఉంచినట్లు పోలీసులు తెలిపారు. అతడు మైనర్ కావడంతో వివరాలు వెల్లడించలేదు. పోలీసులు కనిపించగానే నిందితుడు లొంగిపోయాడని, లాయర్ను నియమించాలని కోరాడని చెప్పారు. 16, 14, 17 ఏండ్ల అమ్మాయిలు కాల్పుల్లో చనిపోయారని చెప్పారు. మరో ఇద్దరి పరిస్థితి సీరియస్గా ఉందని, మిగతా ఆరుగురు స్టేబుల్గా ఉన్నారని తెలిపారు. దాడి తర్వాత స్కూల్లోని స్టూడెంట్లందరినీ పోలీసులు ఇంటికి పంపించారు. వారంపాటు సెలవులు ప్రకటించినట్లు స్కూల్ మేనేజ్మెంట్ తెలిపింది. కాగా, స్కూల్లో కొందరు స్టూడెంట్లతో గొడవలవుతున్నాయని తమ కొడుకు చెప్పాడని, అందుకే స్కూల్కు కూడా ఎగ్గొట్టినట్టున్నాడని దాడికి పాల్పడిన బాలుడి తల్లిదండ్రులు చెప్తున్నారు.
