మిడి లార్డర్ లో ఆడక తప్పని పరిస్థితి : వైస్‌ కెప్టెన్‌ తిలక్‌ వర్మ

•  5, 6వ స్థానాల్లో బ్యాటింగ్ చేస్తూ మ్యాచ్​ ఫినిష్ ​చేయడం సంతృప్తినిస్తోంది: తిలక్​వర్మ

బెంగళూరు: భారత టీ20 జట్టులో తన బ్యాటింగ్‌ స్థానం మార్పుపై వైస్‌ కెప్టెన్‌ తిలక్‌ వర్మ స్పందించాడు. తనకు ఇష్టమైన మూడో స్థానం నుంచి కిందికి వచ్చి 5, 6వ స్థానాల్లో బ్యాటింగ్‌ చేయడం సవాల్‌తో కూడుకున్నదే అయినప్పటికీ, దేశం కోసం మ్యాచ్‌లను ఫినిష్‌ చేయడంలో ఎంతో సంతృప్తి ఉందని చెప్పాడు. శనివారం రాత్రి బెంగళూరులోని చిన్నస్వామి స్టేడియంలో వెస్టిండీస్‌తో ఐదో టీ20 వర్షం కారణంగా రద్దయిన తర్వాత తిలక్‌ మీడియాతో మాట్లాడాడు. యువ ఆటగాళ్లు మానసికంగా దృఢంగా ఉంటూ ఏ పరిస్థితులకైనా ఇట్టే సర్దుకుపోవాలన్నాడు. 

కొంతకాలంగా టీమ్‌ కాంబినేషన్‌ దృష్ట్యా తిలక్‌ వర్మను 5 లేదా 6వ స్థానాల్లో దించుతున్నారు. టాప్‌ ఆర్డర్‌లో అభిషేక్‌ శర్మ, సంజూ శాంసన్‌ ఓపెనర్లుగా రాణిస్తుండగా.. కెప్టెన్‌ శ్రేయస్‌ అయ్యర్‌ నాలుగో స్థానంలో, ఇషాన్‌ కిషన్‌ మూడో స్థానంలో అద్భుతంగా ఆడుతున్నారు. దీంతో తనకు మిడిలార్డర్‌లో ఆడక తప్పని పరిస్థితి ఏర్పడిందని తిలక్‌ పేర్కొన్నాడు. కేవలం 5 నుంచి 6 ఓవర్లు మాత్రమే బ్యాటింగ్‌కు లభించే ఈ స్థానంలో బౌలర్లు వేసే స్లోయర్‌ బాల్స్‌ను సిక్సర్లుగా మలచడానికి నెట్స్‌లో ప్రత్యేకంగా శ్రమిస్తున్నట్లు తెలిపాడు. ఒకటి రెండు రోజులు ప్రాక్టీస్‌ చేస్తే మళ్లీ మూడో స్థానానికైనా సులభంగా మారగలనని చెప్పాడు.

న్యూజిలాండ్‌ టూర్‌లోనూ కొనసాగిస్తాం

వెస్టిండీస్‌తో జరిగిన సిరీస్‌లో భారత్‌ అన్ని మ్యాచుల్లోనూ 200 పరుగులకుపైగా సాధించడం సానుకూలాంశమని తిలక్‌ అన్నాడు. నితీశ్‌ రెడ్డి, శివమ్‌ దూబేలతోపాటు అద్భుతంగా బౌలింగ్‌ చేసిన నమన్‌ ధీర్‌ ప్రదర్శన జట్టుకు ఆత్మవిశ్వాసాన్నిచ్చిందని తెలిపాడు. వెస్టిండీస్‌ టూర్‌లోని లోటుపాట్లను సరిదిద్దుకుని, త్వరలో ప్రారంభంకానున్న న్యూజిలాండ్‌ పర్యటనలోనూ కొనసాగిస్తామని ధీమా వ్యక్తం చేశాడు.