- ఆర్ అండ్ బీ స్పెషల్ సీఎస్ వికాస్ రాజ్ వెల్లడి
- గడువులోగా పనులు పూర్తి చేయాలని అధికారులకు ఆదేశం
- ఫీల్డ్ విజిట్ చేసిన స్పెషల్ సీఎస్
హైదరాబాద్, వెలుగు: టిమ్స్ అల్వాల్ హాస్పిటల్ నిర్మాణ పనులు 70 శాతం పూర్తి అయ్యాయని ఆర్ అండ్ బీ శాఖ స్పెషల్ చీఫ్ సెక్రటరీ వికాస్ రాజ్ తెలిపారు. సీఎం రేవంత్ రెడ్డి, ఆర్ అండ్ బీ శాఖ మంత్రి కోమటి రెడ్డి వెంకట్ రెడ్డి ఆదేశాల మేరకు ఆయన సోమవారం అల్వాల్ టిమ్స్ హాస్పిటల్ నిర్మాణ పనులను పరిశీలించారు. నిర్మాణ ప్రాంగణమంతా తిరిగారు. పనుల పురోగతిపై ఇంజినీర్లు, వర్క్ ఏజెన్సీని వివరాలు అడిగి తెలుసుకున్నారు. అనంతరం ఆయన ఆర్ అండ్ బీ శాఖ ఇంజినీర్లకు, నిర్మాణ సంస్థకు పలు కీలక ఆదేశాలు జారీచేశారు.
ఈ సందర్భంగా ఆయన మాట్లాడుతూ రాష్ట్ర ప్రభుత్వం టిమ్స్ హాస్పిటల్స్ నిర్మాణాన్ని అత్యంత ప్రతిష్టాత్మకంగా తీసుకుందన్నారు. నిర్మాణ పనులను త్వరగా పూర్తిచేసి ప్రజలకు అందుబాటులోకి తేవాలని కృత నిశ్చయంతో ఉందని చెప్పారు. అల్వాల్ టిమ్స్ హాస్పిటల్ 12.14 లక్షల చదరపు అడుగుల విస్తీర్ణంలో రూ.1,196 కోట్ల అంచనా వ్యయంతో నిర్మిస్తున్నామని పేర్కొన్నారు. సీఎం, ఆర్ అండ్ బీ శాఖ మంత్రి ఎప్పటికపుడు పనుల పురోగతిపై మానిటరింగ్ చేస్తున్నారని చెప్పారు.
ఇప్పటికే పూర్తి నాణ్యతతో స్ట్రక్చరల్ వర్క్స్ పూర్తయ్యాయని తెలిపారు. 95 శాతం బ్రిక్ వర్క్స్, ప్లాస్టరింగ్ పూర్తయిందని, 60 శాతం ఎంఈపీ, 50 శాతం ఫ్లోరింగ్, పెయింటింగ్ వర్క్స్ పూర్తయ్యాయని వివరించారు. బ్యాలెన్స్ పనులు వేగంగా జరుగుతున్నాయన్నారు. ప్రభుత్వం విధించిన 2026 మార్చి చివరి నాటి గడువులోగా అన్ని రకాల పనులు పూర్తి చేసి ప్రారంభానికి సిద్ధం చేయాలని ఆర్ అండ్ బీ ఇంజినీర్లు, వర్క్ ఏజెన్సీని ఆయన ఆదేశించారు.
