జనగామ, వెలుగు: ‘‘ఎమ్మెల్యే అంటే నియోజకవర్గానికి సుపీరియర్.. నియోజకవర్గానికి తండ్రి లాంటోడు.. నియోజకవర్గానికి మంత్రిలాగ.. నియోజకవర్గానికి ఎవరు రావాలన్నా ఎమ్మెల్యే అనుమతి తీసుకోవాల్సిందే” అని స్టేషన్ ఘన్పూర్ టీఆర్ఎస్ ఎమ్మెల్యే తాటికొండ రాజయ్య వ్యాఖ్యానించారు. గ్రూపు రాజకీయాలు చేస్తున్నదెవరో తెలుసని, అలాంటివాళ్లు టీఆర్ఎస్ అంటే ఇష్టం లేకుంటే పార్టీ వదిలి వెళ్లి పోవాలని హెచ్చరిస్తున్నానన్నారు. టీఆర్ఎస్ 20వ ఆవిర్భావ దినోత్సవ వేడుకల సందర్భంగా నియోజకవర్గ కేంద్రంలోని టీఆర్ఎస్ ఆఫీస్లో రాజయ్య సోమవారం పార్టీ జెండా ఆవిష్కరించారు. సొంత పార్టీ ముఖ్య నేతలకు తీవ్ర హెచ్చరికలు చేశారు. ‘‘ఎలాంటి గ్రూపు రాజకీయాలు చేయొద్దని అనేక సందర్భాల్లో తెలంగాణ భవన్ నుంచి చెప్పారు. ఒక నియోజకవర్గానికి ఎవరు రావాలన్నా.. ఎమ్మెల్సీ, ఎంపీ, జిల్లా పరిషత్ చైర్మన్, మంత్రి కావొచ్చు ఎవరైనా సరే ఆ ఎమ్మెల్యే కనుసైగలు.. ఆహ్వానం మేరకు మాత్రమే రావాలి. ఒక తల్లి తండ్రికి పుట్టిన వాళ్లయితే తల్లి రొమ్ము కోసే ప్రయత్నం చేయొద్దని హెచ్చరిస్తున్న.. హైకమాండ్ అన్నీ అబ్జర్వ్ చేస్తున్నది. ఎవరు గ్రూపులు తయారుజేస్తున్నది పూర్తిగా తెలుసు.. వారిపై కఠిన చర్యలు ఉంటయ్..’’ అని మండిపడ్డారు. ఏ పదవులైనా, కాంట్రాక్టు పనులైనా, ఇంకా ఏ ఇతర ప్రపోజల్స్ అయినా ఎమ్మెల్యే ద్వారానే పోతాయని చెప్పారు.
వదిలిపెట్టే ప్రసక్తే లేదు
‘‘నేను తీవ్రంగా హెచ్చరిస్తున్న.. పార్టీకి వ్యతిరేకంగా గ్రూపు రాజకీయాలను ప్రోత్సహిస్తున్న వారిని వదిలిపెట్టే ప్రసక్తే లేదు. పార్టీ పదవుల్లో ఉన్నవాళ్లు.. నామినేట్ పదవుల్లో ఉన్నవాళ్లు.. పార్టీ నియమ నిబంధనలకు కట్టుబడి ఉండాలి. ఎమ్మెల్యేకు వ్యతిరేకంగా కార్యక్రమాలు చేస్తున్న వారిని చూస్తూ సహించేది లేదు” అని రాజయ్య హెచ్చరించారు. కేటీఆర్, కేసీఆర్ నాయకత్వంలో తన చివరి రక్తపు బొట్టు వరకు పనిచేస్తానని, పార్టీకి, ప్రభుత్వానికి వ్యతిరేకంగా పనిచేసే వాళ్లను ఎట్టి పరిస్థితుల్లో క్షమించేది లేదన్నారు. అందరికంటే ముందు రూ . 3 కోట్ల సీడీఎఫ్ ఫండ్, రెండున్నర లక్షల జీతం సీఎం రిలీఫ్ ఫండ్కు ఇచ్చానని, కొందరు హైదరాబాద్కు పోయి ఇస్తున్నారని, అది మహాసముద్రం లెక్క అని పేర్కొన్నారు.
