త్వరలో డిపార్ట్మెంట్లతో కమిషన్ మీటింగులు
హైదరాబాద్, వెలుగు: గ్రూప్ 2 నోటిఫికేషన్ పై మళ్లీ కదలిక మొదలైంది. ఇప్పటికే పలు డిపార్ట్మెంట్లు ఖాళీల డేటా ఇవ్వగా, ఎస్టీ రిజర్వేషన్ల పెంపు నేపథ్యంలో వాటిలో మార్పులు చేయనున్నారు. దీనికి సంబంధించిన కసరత్తును టీఎస్పీఎస్సీ మొదలుపెట్టింది. విద్యా, ఉద్యోగ నియామకాల్లో ఎస్టీలకు రిజర్వేషన్లను ఆరు నుంచి పది శాతానికి పెంచుతూ ఇటీవల ప్రభుత్వం ఉత్తర్వులు ఇచ్చింది. అయితే, రాష్ట్రంలో 663 గ్రూప్ 2 పోస్టుల భర్తీ చేస్తామని ప్రభుత్వం ఇదివరకే ప్రకటించింది. దీనికి సంబంధించి ఇప్పటికే ఆయా డిపార్ట్మెంట్ల నుంచి రోస్టర్ తో కూడిన ఖాళీల వివరాలు టీఎస్పీఎస్సీకి అందాయి.
కానీ ప్రస్తుతం ఎస్టీ రోస్టర్ మారడంతో, దానికి అనుగుణంగా మార్పులు చేసి పంపించాలని టీఎస్పీఎస్సీ అధికారులు ఆయా శాఖలను కోరారు. దీనికి సంబంధించి టీఎస్పీఎస్సీ చైర్మన్ జనార్దన్ రెడ్డి నేతృత్వంలోని అధికారుల బృందం సోమవారం నుంచి డిపార్ట్మెంట్లతో సమావేశాలు నిర్వహించనుంది. వివిధ అంశాలపై చర్చించిన తర్వాత రోస్టర్ కు తుది మార్పులు చేయనున్నారు.
