పేద కుటుంబంలో పుట్టిన సుబోధ్. ట్రీట్మెంట్కు డబ్బులు లేక తండ్రి కండ్ల ముందే చనిపోయాడు. సీరియస్ హెల్త్ కండీషన్లో ఉన్న తండ్రి.. సుబోధ్తో.. ‘నువ్వు బాగా చదువుకోవాలి. డాక్టర్ అయి, సేవ చేయాలి’ అనేవాడు. తండ్రి చెప్పిన ఆ మాటల్ని బాగా గుర్తు పెట్టుకున్నాడు సుబోధ్. పేదరికాన్ని జయించి పేదల డాక్టర్ అయ్యాడు. ఇప్పటి వరకూ ‘క్లెఫ్ట్‌ పాలెట్‌’ ( అంగిలి చీలిక )తో పుట్టిన 37వేల మంది పిల్లలకు ఫ్రీ సర్జరీలు చేశాడు.
డాక్టర్ సుబోధ్‌ది ఉత్తర ప్రదేశ్. తండ్రి రైల్వేలో క్లర్క్గా పని చేసేవాడు. డబ్బులు లేకపోవడం వల్ల జబ్బు పడిన తండ్రి చనిపోయాడు. ముగ్గురు పిల్లలతో ఇల్లు గడవడం కష్టమైందా తల్లికి. అయినా సుబోధ్ చదువు మానేయలేదు. సుబోధ్ తల్లి, మరో ఇద్దరు అన్నయ్యలు కలిసి సబ్బులు తయారు చేసేవారు. వాటిని ట్రాఫిక్ సిగ్నళ్ల దగ్గర అమ్మి డబ్బులు సంపాదించేవారు. ఆ డబ్బులతోనే సుబోధ్ చదువు పూర్తి చేశాడు. ‘డాక్టర్ అయ్యి, సమాజానికి సేవ చేస్తూ మంచి పేరు తెచ్చుకోవాలి’ అన్న తండ్రి మాటల్ని మర్చిపోలేదు. కూలీ పని చేసి వచ్చిన డబ్బులు మొత్తం సుబోధ్ చదువుకే పెట్టాడు. అలా పట్టుదలతో మెడిసిన్లో మంచి ర్యాంక్ సాధించాడు. 1983లో పుణేలోని ఆర్డ్మ్‌ ఫోర్సెస్‌ మెడికల్‌ కాలేజీలో, స్టేట్‌ కంబైన్డ్‌ ప్రి–మెడికల్‌ టెస్టులో మూడు డిపార్ట్ మెంట్స్లో మంచి రిజల్ట్ తెచ్చుకున్నాడు. వాటిల్లో సుబోధ్ బిహెచ్‌యు సెలెక్ట్ చేసుకున్నాడు. ఆ టైంలోనే ‘అంగిలి చీలిక’ అనేది జన్యుపరమైన లోపమని తెలుసుకున్నాడు. ఈ సిండ్రోమ్‌తో బాధపడుతున్న వాళ్లు నోరు తెరచి తినడానికి, మాట్లాడటానికి చాలా కష్టపడతారని, ఎప్పుడూ నవ్వలేరని తెలుసుకున్నారు.
మెడిసిన్ పూర్తి చేసుకున్న సుబోధ్ డాక్టర్గా ప్రాక్టీస్ మొదలుపెట్టాడు. 20 ఏండ్ల క్రితం వారణాసిలో హాస్పిటల్ ఏర్పాటు చేశాడు. జన్యుపరమైన అంగిలి చీలికతో పుట్టిన పిల్లలకు ఫ్రీగా ప్లాస్టిక్‌ సర్జరీ చేయడం మొదలుపెట్టాడు. అంగిలి చీలిక సమస్యతో బాధపడుతున్న యువకులు, వృద్ధులకు సుబోధ్ పెద్ద దిక్కయ్యాడు. తన వైద్యసేవలు విస్తృతం చేయాలన్న ఉద్దేశంతో 2003లో ‘స్మైల్‌ ట్రైన్‌ ఇండియా’ టీమ్మొదలుపెట్టాడు. ఈ ప్రాజెక్ట్‌ ద్వారా ప్రపంచ వ్యాప్తంగా అంగిలి చీలిక సర్జరీలు చేస్తున్నాడు. దేశంలోని అన్ని నగరాలకూ తిరుగుతూ వేల సర్జరీలు చేశాడు. ఇప్పటి వరకూ పదేళ్లలోపు ఉన్న 37 వేల మంది పిల్లలకు ఫ్రీగా సర్జరీలు చేశాడు. సుబోధ్ టీమ్లో ప్లాస్టిక్‌ సర్జన్లతో పాటు.. సోషల్ యాక్టివిస్టులు, న్యూట్రిషనిస్టులు, కౌన్సెలింగ్‌ థెరపిస్ట్లు ఉన్నారు. వారణాసిలో ఉన్న సుబోధ్ ఆసుపత్రి చాలా పాపులర్. ప్రపంచవ్యాప్తంగా ఉన్న సర్జన్లు అక్కడ అంగిలి చీలికకు చేసే ఆపరేషన్ల గురించి శిక్షణ ఇస్తారు.
