- గులాబీ పాంప్లెంట్లపై టూర్ షెడ్యూళ్లు
- సేవాకార్యక్రమాలు, పరామర్శలతో హల్చల్
- నియోజకవర్గంలో జోరుగా రాజకీయ ప్రచారం
- సీఎస్ కు ఫిర్యాదులు.. విమర్శలు వస్తున్నా మారని తీరు
భద్రాద్రికొత్తగూడెం, వెలుగు: వైద్య, ఆరోగ్య శాఖలో 'డైరెక్టర్ ఆఫ్ హెల్త్'గా పనిచేస్తున్న గడల శ్రీనివాసరావు వేషం, భాష మార్చి పొలిటీషియన్ అవతారం ఎత్తారు. వచ్చే ఎన్నికల్లో బీఆర్ఎస్ తరుపున కొత్తగూడెం టికెట్ఆశిస్తున్న ఆయన, ఇటీవల రాజకీయ కార్యకలాపాల్లో మునిగితేలుతున్నారు. సేవా కార్యక్రమాలు, పరామర్శల పేరుతో తరుచూ నియోజకవర్గంలో పర్యటిస్తూ హల్చల్ చేస్తున్నారు. ఇప్పటికే కొత్తగూడెంలో జనహిత పేరుతో ఆఫీస్ ఏర్పాటు చేసిన శ్రీనివాస్రావు, ఇటీవల పాల్వంచలో మరో క్యాంప్ ఆఫీస్ ప్రారంభించి, ముమ్మరప్రచారం చేస్తున్నారు. కీలకమైన ఆరోగ్యశాఖలో ఉన్నతాధికారిగా ఉండి, రాజకీయ నాయకుడిలా వ్యవహరిస్తున్న ఆయనపై చీఫ్ సెక్రటరీకి ఫిర్యాదులు వెల్లువెత్తుతున్నా, సొంత శాఖ ఉద్యోగుల నుంచే విమర్శలు వస్తున్నా గడల మాత్రం డోంట్కేర్ అంటున్నారు. తనకు కేసీఆర్, కేటీఆర్మద్దతు ఉందంటూ మరింత దూకుడుగా ముందుకు వెళ్తున్నారు.
గులాబీ పాంప్లెంట్లపై టూర్ షెడ్యూల్స్..
భద్రాద్రి కొత్తగూడెం జిల్లాలోని కొత్తగూడెం సెగ్మెంట్పై కన్నేసిన డీహెచ్ గడల శ్రీనివాసరావు ఇటీవల తరుచూ నియోజకవర్గంలో పర్యటిస్తున్నారు. కొంతకాలంగా కొత్తగూడెంలో ‘డాక్టర్ జీఎస్సార్ ట్రస్ట్’ ద్వారా సేవా కార్యక్రమాలు నిర్వహిస్తున్నారు. ఇటీవల జనహిత పేరుతో ఆఫీసులు తెరిచి, వాటి కేంద్రంగా రాజకీయ కార్యకలాపాలు సాగిస్తున్నారు. బీఆర్ఎస్ తరుపున ఈసారి కొత్తగూడెం నుంచి పోటీ చేయబోతున్నానని, కేసీఆర్, కేటీఆర్మద్దతు తనకే ఉందని ఆ పార్టీ లీడర్లతో చెప్పుకుంటున్నారు. నియోజకవర్గంలో పర్యటనకు ఒకటి, రెండు రోజుల ముందే తన టూర్ షెడ్యూల్తో పాంప్లెంట్స్ రిలీజ్ చేస్తున్నారు. వాటి ద్వారా సోషల్ మీడియాలో జోరుగా ప్రచారం చేసుకుంటున్నారు.
పరామర్శలు, విగ్రహ ప్రతిష్ఠాపనలు, వివాహ వేడుకలు, ఆఫీసుల ఓపెనింగ్లు, టెంపుల్స్లో పూజలు, సర్పంచులు, ఇతర ప్రజాప్రతినిధులతో సమావేశాలు.. ఇలా ఆయన షెడ్యూల్లో ఒక్కో రోజు పదికి పైగా కార్యక్రమాలు ఉంటున్నాయంటే గడల రాజకీయం ఏ స్థాయిలో ఉందో అర్థం చేసుకోవచ్చు. శ్రీనివాసరావు టూర్ షెడ్యూల్ కోసం తయారు చేయిస్తున్న పాంప్లెంట్లు ఎమ్మెల్యేలు, మంత్రుల స్థాయిని మించి, అది కూడా బీఆర్ఎస్ జెండా కలర్ గులాబీ రంగులో ఉంటుండడం విశేషం.
జనహిత వేదికగా పొలిటికల్ కార్యకలాపాలు..
డాక్టర్ జీఎస్సార్ ట్రస్ట్ ద్వారా నిన్న మొన్నటి వరకు కేవలం హెల్త్ క్యాంప్లు, జాబ్ మేళాలకే పరిమితమైన డీహెచ్.. తాజాగా జనహిత పేరుతో ఏర్పాటుచేస్తున్న ఆఫీసులను తన రాజకీయ కార్యకలాపాలకు వేదికగా ఉపయోగించుకుంటున్నారు. ఇప్పటికే శ్రీనగర్లో జనహిత ఆఫీసు తెరిచిన గడల, ఇటీవల పాల్వంచలలో పూర్తిస్థాయి జనహిత ఆఫీస్ ఓపెన్ చేశారు. అక్కడే నేతలతో సంప్రదింపులు జరుపుతూ, రాబోయే ఎన్నికల కోసం వారికి దిశానిర్దేశం చేస్తున్నారు. స్పెషల్గా పీఆర్ఓలను ఏర్పాటు చేసుకొని తన కార్యక్రమాలపై ఎప్పటికప్పుడు ప్రెస్నోట్లు రిలీజ్ చేస్తున్నారు. మేడే సందర్భంగా ట్రస్ట్ఆధ్వర్యంలో పలు కార్మిక సంఘాల నేతలు, కార్మికులను సన్మానించిన గడల..ఖాకీ చొక్కా, ఎర్ర కండూవా కప్పుకొని ర్యాలీలో పాల్గొన్నారు. క్రిస్మస్ టైంలో చర్చీలకు వెళ్లి ప్రేయర్ చేసిన ఆయన, రంజాన్ టైంలో ఇఫ్తార్ ఇచ్చి, నమాజ్ చేశారు.
ఈ సందర్భంగా తాను చిన్నతనంలో రోగం బారిన పడ్తే దర్గా దగ్గర కట్టించిన తావీజ్మహిమ వల్లే బతికిబట్టకట్టానని కామెంట్ కూడా చేశారు. దీనిపై విమర్శలు రావడంతో తన మాటలు వక్రీకరించారని వివరణ ఇచ్చారు. హెల్త్ డైరెక్టర్ హోదాలో ఉండి రాజకీయాలు చేస్తున్న గడలపై ఇప్పటికే సీఎస్కు పలువురు కంప్లయింట్ చేశారు. ఆయన తీరుపై ఉద్యోగ సంఘాల నేతలు కూడా మండిపడ్తున్నారు. ఉన్నతాధికారిగా ఉండి, రాజకీయాలు చేయడమేంటని, పాలిటిక్స్ చేయాలనుకుంటే ఉద్యోగానికి రాజీనామా చేయాలని డిమాండ్ చేస్తున్నారు. కానీ, ఎవరేమన్నా గడల లెక్కచేయట్లేదు. టికెట్పై సీఎం కేసీఆర్, కేటీఆర్ నుంచి పక్కా హామీ ఉన్నందునే ఇంత దూకుడుగా వెళ్తున్నారని, అందువల్లే బార్డర్ దాటుతున్నా ప్రభుత్వం చర్యలు తీసుకోవడం లేదనే అభిప్రాయాలు వ్యక్తమవుతున్నాయి.
