ఖైరతాబాద్, వెలుగు: పీజేఆర్ అంటే కాంగ్రెస్.. కాంగ్రెస్ అంటే పీజేఆర్ అని మంత్రి హరీశ్ రావు అన్నారు. ఆ రోజుల్లో సీఎల్పీ నేతగా పి.జనార్దన్ రెడ్డి(పీజేఆర్) ఎంత కష్టపడ్డారో అందరికీ తెలిసిందేనన్నారు. జూబ్లీహిల్స్ మాజీ ఎమ్మెల్యే పి. విష్ణువర్ధన్ రెడ్డిని బీఆర్ఎస్లోకి ఆహ్వానించేందుకు సోమవారం దోమలగూడలోని ఆయన ఇంటికి మంత్రి హరీశ్రావు వెళ్లారు. సుమారు 20 నిమిషాల పాటు విష్ణు వర్ధన్ రెడ్డితో చర్చలు జరిపారు. అనంతరం హరీశ్ రావు మీడియాతో మాట్లాడారు. ప్రస్తుతం కాంగ్రెస్పార్టీ కొన్ని ముఠాల చేతిలోకి వెళ్లిపోయిందని విష్ణు ఆవేదన వ్యక్తం చేశారని మంత్రి తెలిపారు. ‘2009–14 ’ సమయంలో విష్ణు అధికార పార్టీ ఎమ్మెల్యే అయినా తెలంగాణ ఉద్యమంలో అసెంబ్లీలో ఇద్దరం కలిసి పనిచేశామని, ఆయనకు బీఆర్ఎస్ పార్టీలో సముచిత స్థానం కల్పిస్తామని, అందుకు ఆయన అంగీకరించారని అన్నారు.
కాంగ్రెస్ అన్యాయం చేస్తుందనుకోలేదు: విష్ణువర్ధన్ రెడ్డి
కాంగ్రెస్ పార్టీ ఇంత అన్యాయం చేస్తుందని కలలో కూడా అనుకోలేదని విష్ణువర్దన్ రెడ్డి అన్నారు. కింది స్థాయి కార్యకర్తలు బాగానే ఉన్నారని, పైవాడు అమ్ముడు పోయాడని, ఇలాంటి పరిస్థతి వస్తుందని కలలో ఊహించలేదని ఆవేదన వ్యక్తం చేశారు. ‘‘మా రక్తంలోనే కాంగ్రెస్ఉంది. 35 ఏండ్లు మా నాన్న పార్టీలో పనిచేస్తే, నేను17 ఏండ్లు పనిచేశా. ప్రస్తుత కాంగ్రెస్లీడర్లు గాంధీభవన్అమ్మేస్తారు. ఇలాంటి వాళ్లకి రాష్ట్రాన్ని అప్పగిస్తే చైనాకో అమెరికాకో అమ్మేస్తారు”అని విష్టువర్దన్రెడ్డి ఆరోపించారు. తొందరలోనే పార్టీలో చేరతానని వెల్లడించారు.
