- ఎస్సారెస్పీ కాల్వ కబ్జా.. చర్యలు తీసుకోని ఆఫీసర్లు
వరంగల్ / నర్సంపేట, వెలుగు : నర్సంపేట టౌన్లోని బిట్స్ కాలేజీ సమీపంలో వరంగల్ మెయిన్ రోడ్ పక్కన అక్రమ నిర్మాణాలు జరుగుతున్నాయి. ఓ డాక్టర్ ఎలాంటి అనుమతులు తీసుకోకుండానే ఫంక్షన్ హాల్, రిసార్ట్ నిర్మిస్తున్నాడు. ఎస్సారెస్పీ డీబీఎం 40/1 పిల్ల కాల్వను కలిపేసుకున్నాడు. కాల్వకు సంబంధించి ఇరువైపులా 21 ఫీట్ల వెడల్పు భూమిని కబ్జా చేశాడు. దానిపై రేలింగ్ వేశాడు. ఫంక్షన్ హాల్ నిర్మాణాలకు నాలా అనుమతితో పాటు ఇంజనీరింగ్ ఆఫీసర్ల నుంచి నో ఆబ్జక్షన్ సర్టిఫికెట్ తీసుకోవాలి. కానీ అవేమీ లేకుండానే యథేచ్చగా అక్రమ నిర్మాణాలు చేపడుతున్నాడు. ఆర్ అండ్బీ మెయిన్ రోడ్కు 20 ఫీట్ల సెట్ బ్యాక్ను సైతం వదిలిపెట్టలేదు.
పార్కింగ్కు ఎలాంటి ప్లేస్ లేదు. ఈరూట్లో నిత్యం వేలాది మంది నర్సంపేట టూ వరంగల్కు ప్రయాణిస్తుంటారు. స్థానికులు అభ్యంతరాలు వ్యక్తం చేయడంతో పంచాయతీ, ఇరిగేషన్, ఆర్అండ్బీ ఆఫీసర్లు రంగంలోకి దిగారు. నిర్మాణాలను ఆపివేయించారు. అక్రమ నిర్మాణదారుడికి రాములు నాయక్తండా పంచాయతీ సెక్రటరీ శ్రావణికుమారి మూడు సార్లు నోటీసులు ఇవ్వడంతో అక్రమ నిర్మాణాదారుడు ఆన్లైన్ అనుమతి కోసం డీటీసీపీకి దరఖాస్తు చేసుకున్నాడు.
ఎలాంటి అనుమతులు తీసుకోకుండానే..
మూడు డిపార్టుమెంట్ల అనుమతులు లేకుండానే దర్జాగా ఫంక్షన్ హాల్, రిసార్ట్స్ను కడుతున్నారు. చిన్నపాటి ఇల్లు కట్టుకుంటే అనుమతి, రోడ్ సెట్ బ్యాక్ అంటూ ఆఫీసర్లు సవాలక్ష నిబంధనలు పెడ్తారు. అయితే ఏకంగా మెయిన్ రోడ్ పక్కనే పెద్ద ఫంక్షన్ హాల్ నిర్మిస్తున్నా ఆఫీసర్లు ఆవైపు కన్నెత్తి చూడకపోవడం విస్మయానికి గురిచేస్తోంది. అభ్యంతరాలు రావడంతో ఆలస్యంగా తేరుకున్న ఆఫీసర్లు స్పాట్ను పరిశీలించారు. అవి అక్రమ నిర్మాణాలేనని తేల్చారు. ఆన్లైన్లో పర్మిషన్ కోసం దరఖాస్తు చేసుకోవాల్సిందిగా అక్రమ నిర్మాణదారుడికి సూచించారు. దీంతో సరైన కాగితాలు లేవని డీటీపీసీ ఆఫీసర్లు ఆన్లైన్లో వచ్చిన దరఖాస్తును తిరస్కరించారు.
కలెక్టర్కు నివేదిక పంపారు. కలెక్టర్ ఆదేశాల కోసం ఎదురు చూస్తున్నట్లు డీఎల్పీఓ వెంకటేశ్వర్లు చెప్పారు. మొత్తం మీద మూడు శాఖల ఆఫీసర్లు అక్రమ నిర్మాణాలపై చర్యలు తీసుకోకుండా ఆలస్యం చేస్తున్నారనే చర్చ సాగుతోంది. ఇదే టైంలో అక్రమంగా నిర్మించిన ఫంక్షన్ హాల్ను కూలగొట్టకుండా ఉండేందుకు సదరు నిర్మాణదారుడు అధికార పార్టీకి చెందిన లీడర్ల ద్వారా ఆఫీసర్లపై ఒత్తిడి తెస్తున్నట్లు సమాచారం. అయితే కండ్లెదుటే అక్రమనిర్మాణం జరుగుతున్నా, మూడు నోటీసులను ఖాతరు చేయకపోయినా అధికారులు ఎందుకు సీరియస్ చర్యలు తీసుకోవడం లేదని పలువురు ప్రశ్నిస్తున్నారు.
